Jalgaon Crime News : शहरातील सिंधी कॉलनी परिसरातील मोबाईल दुकानदाराला दोन तरुणांनी चॉपरने वार करून गंभीर दुखापत केल्याची घटना घडली.

जिल्हापेठ पोलिस ठाण्यात याप्रकरणी हल्लेखोर दोघांवर गुन्हा दाखल करण्यात आला आहे.(Chopper attack on shopkeeper in Sindhi Colony jalgaon crime news)

शहरातील सिंधी कॉलनी परिसरात सुमीत वसंतलाल वलबानी (वय ३१) तरुण आपल्या परिवारासह वास्तव्याला आहे. मोबाईल दुकान चालवून आपला उदरनिर्वाह करतो. मंगळवार (ता.१४) रोजी रात्री साडेबारा वाजता सुमीत वलबानी हा त्याच्या घरासमोर उभा होता.

रात्रीच्या वेळेस कॉलनीत दोन जण फिरत होते. त्यावेळी विनाकारण काय फिरता असे सुमितने विचारले. याचा राग आल्याने संशयित आरोपी आर्यन पवार (रा. शनिपेठ) व त्याचा साथीदार नामिर खान अशा दोघांनी चॉपरने वार करून सुमितला जखमी केले.

हा प्रकार घडल्यानंतर सुमितला तातडीने खासगी रूग्णालयात उपचारासाठी दाखल करण्यात आले. दरम्यान सुमीत वलबानी यांनी दिलेल्या फिर्यादीवरून जिल्हापेठ पोलिस ठाण्यात दोन जणांविरोधात गुन्हा दाखल करण्यात आला आहे. पोलिस उपनिरीक्षक गणेश देशमुख तपास करीत आहेत.