जळगाव : जानेवारीच्या सुरुवातीपासून जिल्ह्यात सुरू असलेला थंडीचा कडाका जानेवारी अखेरपर्यंत कायम राहणार असल्याचा अंदाज हवामान विभागाने वर्तविला आहे. जम्मू काश्‍मीर(Jammu and Kashmir), हिमाचल प्रदेशात(Himachal Pradesh) होत असलेल्या हिमवृष्टीचा परिणाम म्हणून खानदेशात थंडीचा कडाका वाढला आहे. थंडीच्या कडाक्याचा परिणाम नागरिकांच्या आरोग्यावर होत असून सर्दी, खोकला, अंगदुखी आदींमुळे नागरिक त्रस्त आहे.

हिमाचल प्रदेश, जम्मू काश्‍मीरमध्ये हिमवृष्टीने गार वारे वाहू लागले आहे. त्याचा परिणाम उत्तर महाराष्ट्रात वाहणाऱ्या वाऱ्यावर होऊन सकाळी व रात्री शितलहरी वाहू लागतात. हवेतील गारव्याचा विपरीत परिणाम शरीरावर होत असून नागरिकांना व्याधी जडू लागल्या आहेत. ज्येष्ठांना २४ तास गरम कपडे घालावे लागत आहे. इतरांनाही पायदुखी, कंबरदुखी, अंगदुखी, डोकेदुखी अशा व्याधी सुरू झाल्या आहेत. काहींना तापही येत आहे. सध्या कोरोनाचे वातावरण आहे. गार वातावरणात बहुतेकांना सर्दी खोकला, ताप, अंगदुखी असे लक्षणे असल्याने ते कोरोनाची चाचणी ऐवजी फॅमिली डॉक्टरकडे जाऊन औषधोपचार करून घेत आहे.

जिल्ह्यातील तापमान २१ जानेवारीपर्यंत किमान १३ ते १५ अंशापर्यंत राहणार आहे. दुपारी मात्र उन्हाचा कडाका जाणवेल. सायंकाळी पुन्हा तापमानात घट होईल, असे चित्र असणार आहे. जोपर्यंत हिमाचलप्रदेशातील गार वारे वाहणे बंद होत नाही, तोपर्यंत अशीच स्थिती जिल्ह्यातील वातावरणाची राहिल, अशी माहिती हवामानतज्ज्ञ निलेश गोरे यांनी दिली.

अतिवृष्टीचा परिणाम नाही

यंदा जिल्ह्यात अनेक ठिकाणी अतिवृष्टी झाली आहे. सरासरी पावसाने शंभरी ओलांडून १२० टक्क्यांपर्यंत मजल गाठली असल्याने थंडीचा कडाका वाढला असे अनुभवी नागरिक सांगतात. मात्र हवामान विभागाच्या मतानुसार तसे चित्र नाही. हिमाचल प्रदेशातील शितलहरीमुळे थंडीचा कडाका वाढला असल्याचे सांगण्यात आले.

गेल्या काही दिवसातील तापमान असे

तारीख- कमाल- किमान (अंश)

• १४ जानेवारी - २७ - १६

• १५ जानेवारी - २८ - १५

• १६ जानेवारी - २७ - १४

• १७--जानेवारी - २८ - १५