जळगाव : जिल्ह्यात तीन आठवड्यांपासून वाढत जाणारा कोरोनाचा उद्रेक कायम आहे. आज सलग सहाव्या दिवशी नव्या रुग्णांनी तीनआकडी संख्या गाठत गेल्या पाच महिन्यांतील उच्चांकी म्हणजे ३६८चा आकडा गाठला. त्यामुळे एकूण रुग्णसंख्या आता ६० हजारांच्या टप्प्यात आहे. 

जळगाव जिल्ह्यात चार महिन्यांपासून नियंत्रणात येत असलेला कोरोनाचा संसर्ग तीन आठवड्यांपासून पुन्हा वाढत आहे. गेल्या सहा- सात दिवसांत तर तो नियंत्रणाबाहेर जाण्याची स्थिती निर्माण झाली आहे. सोमवारी नव्याने ३१९ रुग्ण सापड्ल्यानंतर मंगळवारीही तब्बल ३६८ नवे रुग्ण समोर आले. त्यामुळे एकूण आकडा ५९ हजार २२२वर पोचला आहे. तर गेल्या २४ तासांत १०१ रुग्ण बरे झाले, त्यामुळे बरे होणाऱ्यांची संख्याही ५६ हजार २७९ झाली आहे. दोघांचा मृत्यू झाल्यानंतर बळींचा आकडा १३७७ झाला असून प्रचंड वाढलेल्या रुग्णसंख्येमुळे मृत्यूदर स्वाभाविकच कमी होऊन २.३३ टक्क्यांपर्यंत घसरला आहे. 

दोन हजारांवर चाचण्या 
तीन आठवड्यांपासून वाढत जाणारी रुग्णसंख्या बघता जिल्हाधिकाऱ्यांनी चाचण्या वाढविण्याच्या सूचना केल्या होत्या. त्यानुसार आरोग्य यंत्रणेने या आठवड्यात चाचण्यांचे प्रमाण वाढविले आहे. त्यानुसार मंगळवारी ११७० आरटीपीसीआर व १२२३ अॅन्टीजेन म्हणजे एकूण २४०० चाचण्यांचे अहवाल प्राप्त होऊन त्यापैकी ३६८ अहवाल पॉझिटिव्ह आले. 
 

जळगाव शहर रेड झोन 
जळगाव शहरातील संसर्ग झपाट्याने वाढत आहे. शहरात सलग दुसऱ्या दिवशी नव्या रुग्णांनी शंभरी पार केली. सोमवारी १५८ रुग्ण आढळून आल्यानंतर मंगळवारी तब्बल १६२ रुग्ण समोर आले. त्याखालोखाल चाळीसगाव ५५, जळगाव ग्रामीण ३४, चोपडा २८, भुसावळ २३, मुक्ताईनगर २३, एरंडोल ६, रावेर ७, अमळनेर ५, पाचोरा, भडगाव, धरणगाव तालुक्यात प्रत्येकी २, पारोळा ७, बोदवड ३ असे रुग्ण आढळून आले. 

गंभीर रुग्ण दीडशेपर्यंत 
वाढत्या रुग्णसंख्येसोबत ॲक्टिव व गंभीर रुग्णांची संख्याही वाढली आहे. जिल्ह्यात मंगळवारी १५६६ सक्रिय रुग्ण होते. त्यापैकी ९४ रुग्ण ऑक्सिजनवर तर ५२ गंभीर रुग्ण आयसीयूमध्ये दाखल आहेत. 

 
संपादन- भूषण श्रीखंडे