मेहुणबारे (ता. चाळीसगाव) : चाळीसगाव तालुक्यात यावर्षी कापसाला चांगला भाव मिळाल्याने बळीराजा हा सुखावला आहे. बळीराजाने खरिपाच्या पेरणीसाठी पूर्व मशागतीचे काम सुरू केले असले तरी गिरणा पट्ट्यातील बहुतांश शेतकऱ्यांकडे विहिरीला मुबलक पाणी आहे. अशा शेतकऱ्यांनी कपाशी लागवडीला देखील सुरवात केली आहे. तालुक्यात यावर्षी ६० हजार आठशे हेक्टरवर कपाशी लागवड होणार आहे. यासाठी कपाशी बियाणेच्या ३ लाख ४ हजार ३६० कपाशी बॅग बाजारात उपलब्ध झाल्या असल्याची माहिती तालुका कृषी विभागाने दिली. ज्या शेतकऱ्यांच्या विहिरींना पाणी नाही, अशा शेतकऱ्यांनी एक जूननंतरच कपाशी लागवड करावी, असे आवाहन तालुका कृषी विभागामार्फत करण्यात आले आहे.

चाळीसगाव तालुक्यात खरीप हंगामात लागवडीखाली क्षेत्र सुमारे ७८ हजार ३३९ हेक्टर असून, त्यात प्रामुख्याने प्रमुख कपाशी हे पीक आहे. त्यामुळे आगामी खरीप हंगामात सुमारे ६० हजार ८७२ हेक्टर क्षेत्रावर पांढरे सोने अर्थात कपाशी लागवड होणार आहे. त्यासाठी यावर्षी ३ लाख ४ हजार ३६० बियाण्याचे पाकीट लागणार असून, बाजारात देखील उपलब्ध झाले आहेत, अशी माहिती तालुका कृषी विभागाने दिली.

बागायती क्षेत्र वाढले

चाळीसगाव तालुक्यात ठिबक सिंचनद्वारे पाणी बचत होते. त्यामुळे बागायत क्षेत्रात वाढ झाल्याचे चित्र सध्या गिरणा परिसरात एकंदरीत दिसत आहे. विक्रेत्यांना कपाशी बियाण्याचे पाकिटे १५ मेपर्यंत प्राप्त झाली होती. मागील काही वर्षांपासून कापसावर मोठ्या प्रमाणावर बोंडआळीचा प्रादुर्भाव वाढला आहे. यामुळे पिकाचे एकात्मिक कीड व्यवस्थापन व्हावे, यासाठी कृषी विभागाकडून विविध उपाययोजना केल्या जात आहेत.

मशागत अंतिम टप्प्यात

एक जूननंतरच बीटीचे बियाणे कृषी विभागाने नियोजन केले आहे. मात्र यावर्षी कपाशीच्या उत्पादनात घट झाली असली तरी भाव चांगला मिळाल्याने येत्या खरीपामध्ये शेतकऱ्यांकडून कपाशीची लागवड वाढण्याची शक्यता आहे. त्यामुळे गेल्यावर्षीच्या तुलनेत यंदा कृषी विभागाकडून कपाशीच्या वाढीव क्षेत्राचे नियोजन करण्यात आले आहे. खरीप हंगामाची तयारी सुरू झाली असून, शेतीची मशागत अंतिम टप्प्यात आहे. मान्सूनही आठ ते दहा दिवस आधी धडकणार असल्याचा अंदाज हवामान खात्याने वर्तविला असून कृषी विभागानेही खरीप हंगामाच्या पेरणीचे नियोजन केले आहे.