Jalgaon Crime News : एमआयडीसी पोलिस ठाण्याच्या हद्दीतील ग्रामीण भागात वास्तव्यास असलेल्या १६ वर्षीय युवतीवर शेजारच्या विवाहित पुरुषाने अत्याचार केल्याची घटना घडली.()

पीडितेने पालकांना सांगितल्यांतर पीडितेच्या तक्रारीवरून एमआयडीसी पोलिस ठाण्यात रात्री उशिरा गुन्हा दाखल करण्यात आला.

याबाबत माहिती अशी ः

शहरालगतच्या ग्रामीण भागात १६ वर्षीय युवती कुटुंबीयांसह राहते. मंगळवारी (ता. १२) सकाळी दहाला शेजारच्या योगेश तेजमल पवार याने पीडितेच्या घरी येऊन तिला सांगितले, की तुला माझ्या पत्नीने घरी वरच्या मजल्यावर बोलावले आहे.

पीडिता संशयिताच्या घरी वरच्या मजल्यावर गेली असता संशयिताने तिच्यावर अत्याचार केला. भेदरलेल्या युवतीवर कुटुंबीयांचे लक्ष गेल्यावर त्यांनी चौकशी केली व अत्याचाराचा प्रकार समोर आला. त्यानंतर कुटुंबाने तातडीने युवतीसह एमआयडीसी पोलिस ठाणे गाठले.

पीडितेच्या फिर्यादीवरून संशयित योगेश पवार याच्याविरोधात एमआयडीसी पोलिस ठाण्यात गुन्हा दाखल झाला. युवतीवर अत्याचार झाल्याने ती गोंधळून गेली. घडल्या प्रकाराबाबत कुणाला सांगू नये, यासाठी संशयित योगेश पवार याने धमकावल्याचेही पीडितेने तक्रारीत म्हटले आहे. त्याची कुणकुण लागताच तो फरारी झाला. सहाय्यक पोलिस निरीक्षक ए. सी. मोरे तपास करीत आहेत.