जळगाव ः परिविक्षाधीन आयएएस प्रांताधिकारी तृप्ती धोडमिसे यांच्या पाळतीवर असलेल्या दोन तरुण विद्यार्थ्यांना जिल्‍हापेठ पोलिसांनी ताब्यात घेतले. दोघांनी पाठलाग केल्याचे कबूल केले असून, एका वाळूमाफियाचे नावदेखील पोलिसांना सांगितल्याचे खात्रीलायक वृत्त आहे. याप्रकरणी पोलिसांत कुठलाच गुन्हा नोंद होऊ शकला नाही. 

आवश्य वाचा- धक्कादायक! पिता-पुत्राचे सुरू होते भांडण; वडिलांनी चाकु हिसकावताच घडले भयंकर
 

जळगाव जिल्ह्यातील अवैध धंदेवाईक आणि वाळूमाफियांची हिंमत कमालीची वाढली आहे. आर्थिक वर्षाखेर जवळ येत असून, महसुली अधिकाऱ्यांतर्फे कारवाई तीव्र होण्याची शक्यता आहे. त्यात परिविक्षाधीन अधिकारी असल्यास त्यांचा कारवाईचा धडाकाच वेगळा असतो. परिणामी जळगाव शहरातील वाळूमाफियांनी महिला आयएएस अधिकाऱ्यावर चक्क महाविद्यालयीन विद्यार्थ्यांसारखे दिसणारे तरुण पाळतीवर ठेवल्याचा धक्कादायक प्रकार समोर आला आहे. 

तरुणांकडून पाठलाग..

प्रांताधिकारी तृप्ती धोडमिसे (आयएएस) यांना आपला पाठलाग केला जात असल्याची जाणीव झाली. निवासस्थानापासून पाठलाग करणारे तरुण कार्यालयातही पाळतीवर असल्याचे निष्पन्न झाल्यावर त्यांनी तत्काळ पोलिसांना घटनेची माहिती कळवली. जिल्‍हापेठ पोलिसांनी दोन तरुणांना ताब्यात घेतल्यावर चौकशी केली. त्या दोघांनी हे करण्यासाठी एका व्यावसायिकाचे नाव घेत पोलिसांकडे कबुली दिल्याचे वृत्त आहे. मात्र, याप्रकरणी अद्याप कुठलाच गुन्हा दाखल झालेला नव्हता. या तरुणांना ताब्यात घेतले होते, मात्र कॉलेजचे विद्यार्थी असल्याने आणि तक्रार नसल्याने समज देऊन सोडून दिल्याचे जिल्हापेठ पोलिसांनी सांगितले. 
 

आवर्जून वाचा- 'कटप्पा ने बाहूबली को क्यों मारा' असे पून्हा का म्हणाले जलसंपदा मंत्री  
 

मी घरातून निघाल्यापासून दोन जण पाठलाग करीत होते. ते प्रांताधिकारी कार्यालयापर्यंत आले. मी पोलिसांना बोलावून त्यांना ताब्यात दिले आहे. याप्रकरणी गुन्हाही दाखल करणार आहे. 
- तृप्ती धोडमिसे, परिविक्षाधीन प्रांताधकारी 
 

संपादन- भूषण श्रीखंडे