Abhay Shasti Yojana: शहरातील घरपट्टी थकबाकीदारांसाठी अभय शास्ती योजना लागू करण्यात आली आहे. त्याअंतर्गत रामेश्‍वर कॉलनीतील कोंडू फकिरा पवार यांच्याकडे ६४ हजारांची थकबाकी होती.

त्यांना व्याज व दंडाची २४ हजारांची सूट देण्यात आली. योजनेतील सहभागासाठी महापालिकेच्या कार्यालयात शहरवासीयांनी गर्दी केली होती. (Crowd in Municipal Corporation for participation in Abhay Shasti Yojana jalgaon news)

घरपट्टी थकबाकीदारांना रक्कम न भरल्याने घर लिलाव करण्याची अंतिम नोटीस बजावण्यात आली आहे. मात्र काही थकबाकीदारांनी आम्हांला घरपट्टी भरण्याची एक संधी द्यावी, अशी मागणी केली होती.

त्यानुसार महापालिका आयुक्त डॉ. विद्या गायकवाड यांनी शेवटची संधी म्हणून थकबाकी भरणाऱ्यासाठी अभय शास्ती योजना लागू केली. योजनेत घरपट्टी भरणाऱ्यांना व्याज व दंड माफ करण्याचा निर्णय घेण्यात आला आहे.

३ कोटींहून अधिक जमा

योजना ४ डिसेंबरपासून लागू करण्यात आली असून ती १९ डिसेंबरपर्यंत सुरू राहील. योजनेत सहभागी न होणाऱ्यांना कोणतीही सवलत न देता त्यांच्या मालमत्तेचा लिलाव करण्याचा इशारा महापालिकेच्या प्रशासनाने दिला आहे. योजनेला सुरुवात झाल्यापासून आत्तापर्यंत तीन कोटी पाच लाख रुपयांचा भरणा शहरवासीयांनी केला आहे.

"अभय शास्ती योजनेचे शेवटचे ७ दिवस बाकी आहेत. थकबाकीदारांनी योजनेचा लाभ घेऊन आपली घरपट्टी कराची थकबाकी भरावी आणि लिलाव टाळावा." - गणेश चाटे, उपायुक्त, महापालिका