जळगाव : येथील शासकीय वैद्यकीय महाविद्यालय व रुग्णालयात दर बुधवारी दिव्यांग प्रमाणपत्र मिळण्याबाबतच्या कार्यवाहीसाठी दिव्यांग बांधवांची वैद्यकीय तपासणी करण्यात येत आहे. त्यासाठी तारखेचे कूपन आगाऊ देण्यात येते. ज्या बांधवांना कुपन आवश्यक आहे, त्यांनी शासकीय कामकाजाच्या कोणत्याही दिवशी कार्यालयीन वेळेत कुपन घेण्यासाठी यावे, असे आवाहन रुग्णालयाच्या दिव्यांग बोर्डातर्फे करण्यात आले आहे.

रुग्णालयात कोरोनाविरहित आजारांवर उपचार सुरू झाले आहे. त्यासोबत दिव्यांग बांधवांच्या वैद्यकीय तपासणी दर बुधवारी सकाळी नऊला सुरू होते. दिव्यांग बांधवांची गैरसोय थांबावी याकरिता आगाऊ बुकिंग कुपन प्रणाली सुरू करण्यात आली आहे. त्यानुसार हे कुपन शासकीय कामकाजाच्या कोणत्याही दिवशी मिळत असून कार्यालयीन वेळेतच घ्यायला यावे, असे आवाहन करण्यात आले आहे. अनेक दिव्यांग बांधवाना रेल्वे सवलत प्रक्रिया करावयाची असते. त्याकरिता अनेक जण फक्त बुधवारीच येतात, असे निदर्शनास आले आहे. मात्र ही प्रक्रियादेखील सरकारी कामकाजाच्या कोणत्याही दिवशी केली जाते आहे. त्याचाही दिव्यांग बांधवांनी लाभ घ्यावा असे आवाहन करण्यात आले आहे.

प्रमाणपत्र मिळण्याबाबतची प्रक्रिया

दिव्यांगत्व प्रमाणपत्र मिळण्यासाठी लाभार्थ्यांनी शासकीय संकेतस्थळ (www.swavlambancard.in) येथे जाऊन (Apply for Disability certificate & UDID card) या लिंकवर जाऊन अर्ज भरणे आवश्यक आहे. तेथे प्रमाणपत्र नूतनीकरणाची देखील लिंक उपलब्ध आहे. या अर्जाची प्रिंट काढून दिव्यांग मंडळातून कोणत्याही शासकीय कामकाजाच्या दिवशी जाऊन बुकिंग कुपन घ्यावे. कुपनावर दिलेल्या तारखेला अर्जासह आधारकार्ड, रेशनकार्ड, पासपोर्ट २ फोटो व जुने दिव्यांग प्रमाणपत्र तथा संबंधित उपचाराची कागदपत्र घेऊन शासकीय वैद्यकीय महाविद्यालय व रुग्णालयात लाभार्थ्यांनी सकाळी ९ वाजता वेळेवर उपस्थित राहावे.