Jalgaon News : कधी काळी नदीपात्रातील डांगर, टरबूज खाऊन ढेकर देणारे खानदेशवासीय आता या संधीला मुकण्याच्या अवस्थेत आले आहेत. (Dangarmale in riverbed is decreasing in Khandesh jalgaon news)

डिसेंबरमध्येच नद्या लुप्त होऊ लागल्याने नदीपात्रातील डांगरमळे आता खानदेशात नावालाच उरले आहेत. ऐंशी, नव्वदच्या दशकापर्यंत खानदेशात तापी, पांझरा, बोरी, अनेर, अरूणावती, रत्नवाती, वाघूर, अंजनी, तोरी, मोर, गुळी या नद्यांमध्ये मोठ्या प्रमाणात डांगरमळे राहत असत.

बऱ्याचदा नदी पायी पार करणारे प्रवासी, वाटसरू याच वासाने डांगर, टरबूज खाल्ल्याशिवाय पुढे मार्गस्थ होत नसत. याच मळ्यात दोडके, गिलके, कारले, काकडी, पिकत असे. मात्र काळ बदलला, नद्या लुप्त होऊ लागल्या आणि डांगरमळे दिसेनासे झाले. आजही ते काही डोहाजवळ एक, दोन दिसून येतात.

खानदेशात भोई, कोळी बांधवांसह अन्य समाजबांधव सुद्धा हा व्यवसाय करत असत. मात्र नद्या लुप्त होऊ लागल्याने हे बांधव अन्य व्यवसायाकडे वळले. आता फेब्रुवारी, मार्च पासूनच नद्या आग ओकू लागतात. त्यामुळे उन्हाळ्यातील नदीपात्रातील हिरवाई कधीच लुप्त झाली. भर उन्हाळ्यात नदीपात्रावरून येणाऱ्या थंड गारव्याला गावकरी आता पारखे झाले आहेत.

मात्र आता काही नद्यांमध्ये साचलेल्या डोहाजवळ त्यामधील पाण्याच्या भरवशावर डांगरमळे होत आहेत. या नद्यांमध्ये उन्हाळ्यात धरणाचे पाणी सोडल्यास मळे वाहून जातात तर कधी पाणीच लुप्त झाल्याने सुकून जातात. मात्र खानदेशात आजही ही रिस्क घेऊन काही बांधव हा प्रयोग करत आहेत.