Jalgaon News : तालुक्यातील सावखेडासिम येथे गटारात स्त्री जातीचे मृत अर्भक आढळून आले आहे. यावल पोलिसांनी अर्भकास ताब्यात घेत वैद्यकीय तपासणीसाठी जळगाव येथे पाठविले आहे. (Dead female infant found in sewer jalgaon news)

सावखेडासिम (ता. यावल) गावात एका व्यक्तीला सोमवारी (ता.२५) गटारीत अपूर्ण दिवसाचे स्त्री जातीचे मृत अर्भक दिसले. त्यांनी तत्काळ गटारीतून अर्भक बाहेर काढून गावातील पोलिस पाटील पंकज बडगुजर यांना सांगितले.

याबाबत यावल पोलिसात दूरध्वनीद्वारे कळविण्यात आले आहे. हे अर्भक स्त्री जातीचे असून, ते पाच ते सहा महिन्यांचे असावे, असा अंदाज ग्रामस्थांकडून व्यक्त केला जात आहे. हे संतापजनक कृत्य करणाऱ्या नराधमास किंवा त्या अज्ञात महिलेचा शोध घेऊन त्यांच्यावर कारवाई करावी, अशी मागणी ग्रामस्थ करीत आहेत.

दरम्यान, हा प्रकार पाहण्यासाठी ग्रामस्थांनी घटनास्थळी गर्दी केली होती. गावात सकाळी आठच्या सुमारास ही घटना निदर्शनास आली असून, यावल पोलिस ठाण्यात माहिती कळविल्यावर पोलिस निरीक्षक राकेश मानगावकर यांच्या आदेशावरून तत्काळ घटनेचे गांभीर्य लक्षात घेत सहाय्यक फौजदार विजय पाचपोळे व पोलिस कर्मचारी राजेंद्र पवार यांनी सावखेडासिम येथे घटनास्थळी भेट देत मृत अर्भकास पंचमाना करीत ताब्यात घेतले. गावातील पोलिस पाटील पंकज बडगुजर यांनी दिलेल्या फिर्यादीवरून पोलिस ठाण्यात गुन्हा दाखल करण्यात आला आहे.