जळगाव : कापूस उत्पादक शेतकऱ्यांनी कापसाला दहा ते १३ हजारांचा दर मिळावा, यासाठी ९० टक्के कापूस घरात ठेवला आहे. असे असताना, सोमवारी (ता. २६) कापसाच्या दरात तब्बल एक हजारांची घसरण झाली. यामुळे कापूस उत्पादक शेतकऱ्यांची कापूस दराबाबतची चिंता आणखी वाढली आहे. शेतकऱ्यांना दराबाबत आशा होती, त्यावर पाणी फिरण्याची चिन्हे आहेत.

मागील आठवड्यात आठ ते साडेआठ हजारांचा दर कापसाला होता. यामुळेच ‘सीसीआय’ने ८ आठ हजार ४०० रुपये दराने खुल्या बाजारात खरेदी सुरू करण्याचे सांगितले होते. आता मात्र कापसाचे दर कमी झाल्याने ‘सीसीआय’ काय दराने कापूस घेणार याबाबत शेतकऱ्यांमध्ये उत्सुकता आहे.

यंदा कापसाचा पेरा ११० टक्के झाला होता. परतीच्या पावसाने अनेक ठिकाणी कपाशीचे नुकसान झाले असले, तरी चांगले उत्पादन हाती आले होते. बाजारात कापसाला आठ ते नऊ हजारांचा दर होता. मात्र, शेतकरी कापसाला दहा ते १३ हजारांचा दर मिळावा, यासाठी कापूस विक्रीस आणीत नव्हते.

९५ टक्के कापूस घरात असताना, शेतकऱ्यांनी कापूस विक्रीस आणावा, यासाठी जिनिंग चालक कापसाला दर देत होते. वास्तविक कापसाला हमीभाव सहा हजार सहाशे रुपये आहे. हमीभावापेक्षा अधिकच दर देऊन बाजारात कापूस विक्रीस येत नाही. यामुळे जिनिंग उद्योग संकटात आला आहे.

कापूस बाजारात यावा, यासाठी ‘सीसीआय’ने खुल्या बाजारात उतरून कापूस खरेदी काही जिल्ह्यात सुरू केली. जळगाव जिल्ह्यातही खरेदी सुरू करण्याबाबत सांगणयात आले होते. मात्र, मार्केट फी शुल्कावरून तो विषय अडकला आहे.

खंडीचा दर ५७ हजार

कापसाच्या खंडीचा दर पूर्वी ६२ ते ६८ हजारांपर्यंत होता. तो रविवारी (ता. २५) ५६ ते ५७ हजारांपर्यंत खाली आला आहे. यामुळे कापसाचे दर प्रतिक्विंटल ७३०० ते ७५०० झाले आहेत. अजून काही महिने असेच दर राहतील, असे कापूस अभ्यासक सांगतात.