Jalgaon Fraud Crime : चोपडा तालुक्यात महिला वनरक्षक पदावर कार्यरत ३३ वर्षीय तरुणीने जीवनसाथी ॲपवर रजिस्ट्रेशन केले होते. संबंधित सायबर गुन्हेगारांनी जीवनसाथी ॲपच्या माध्यमातून सावज हेरत संपर्क वाढविला.

भूलथापा देत चक्क चार लाख ८९ हजार रुपयांत फसवणूक केल्याचा प्रकार उघडकीस आला असून, सायबर पोलिस ठाण्यात या प्रकरणी गुन्ह्याची नोंद करण्यात आली आहे. (female forest guard was cheated Through Jeevansathi app jalgaon crime news)

सायबर गुन्हेगारीचे विश्व दिवसेंदिवस विस्तारत चालले आहे. ऑनलाइन पद्धतीने पैशांचे व्यवहार करणारे, विविध वेबपोर्टलवर वैवाहिक कारणांसाठी किंवा नोकरी कामानिमित्त अपलोड केलेल्या माहितीचा दुरुपयोग करून सायबर गुन्हेगारांकडून आर्थिक फसवणूक केली जात आहे.

डॉ. सनिष अमितराव पेमा याने विविध इलेक्ट्रिक संसाधनाचा वापर करून तक्रारदार महिलेशी जीवनसाथी ॲपवर संपर्क केला.

त्यानंतर विश्वास संपादन करून वेगवेगळ्या कारणांचा हवाला देत गाझियाबाद, उत्तर प्रदेश येथील बँक खात्यावर पेटीएमद्वारे चार लाख ८९ हजार रुपये उकळण्यात आल्याचा प्रकार समोर आला.

पैसे दिल्यानंतर आपली फसवणूक झाल्याचे निदर्शनास आल्याने तातडीने त्यांनी सायबर पोलिसांत धाव घेत तक्रार दिल्यावरून संशयितांच्या विरुद्ध गुन्हा दाखल करण्यात आला आहे. पुढील तपास पोलिस निरीक्षक लीलाधर कानडे करीत आहेत.