जळगाव : राज्यातील 7 हजार 135 ग्रामपंचायतींसाठी 18 डिसेंबरला मतदान पार पडलं. या ग्रामपंचायतींचा आज (ता. 20) निकाल आहे. यात जळगाव जिल्ह्यातील जामनेर तालुक्यात असलेल्या मोहाडी ग्रामपंचायतीच्या निकालावर संपूर्ण राज्याचे लक्ष लागून होते.

या ठिकाणी निवडणुकीत गुजरात भाजपचे प्रदेशाध्यक्ष सी. आर. पाटील यांच्या कन्या भाविनी पाटील यांनी लढत दिली. या लढतीत त्यांचा विजय झाला आहे, मात्र मंत्री गिरीश महाजन यांचा मतदार संघ अन् बालेकिल्ला असणाऱ्या या परिसरात महाजन यांना मोठा धक्का बसला आहे.

(Gram Panchayat Election Results 2022)

मंत्री गिरीश महाजन यांचा मतदार संघ असलेल्‍या जामनेर तालुक्‍यातील ग्रामपंचायतींकडे विशेष लक्ष होते. मुख्‍य म्‍हणजे या निवडणुकीत गुजरात भाजपचे प्रदेशाध्यक्ष सी. आर. पाटील यांच्या कन्या भाविनी पाटील यांच्‍या निकालाकडे लक्ष लागले होते. यात भाविनी पाटील यांनी विजय मिळविला आहे.

पॅनलला पराभवाचा धक्‍का

भाविनी पाटील यांचा विजय झाला असला तरी मोहाडी ग्रामपंचायतीत त्यांचे ग्रामविकास पॅनल पराभूत झाले आहे. भाविनी पाटील यांच्या पॅनलला भाजप प्रणितच लोकशाही उन्नती पॅनलने पराभवाचा धक्का दिला आहे. गेल्या पाच वर्षात गावाने जी हुकूमशाही पाहिली त्याचा अस्त झाल्याची प्रतिक्रिया लोकशाही उन्नती पॅनलचे प्रमुख शरद पाटील यांनी दिली आहे.