जळगाव : जिल्ह्यातील अंत्योदय आणि प्राधान्य कुटुंबांनी आनंदाचा शिधा उपक्रमाचा लाभ घ्यावा. दिवाळी किटपासून कोणीही वंचित राहणार नाही याची जिल्हा पुरवठा अधिकारी व तहसीलदारांनी काळजी घ्यावी, असे आवाहन पालकमंत्री गुलाबराव पाटील यांनी केले.

पाळधी (ता. धरणगाव) येथे आनंदाचा शिधा-दिवाळी किट वितरणाचा प्रारंभ पालकमंत्री गुलाबराव पाटील यांच्या हस्ते झाला. त्या वेळी ते बोलत होते.(Guardian Minister Gulabrao Patil Gain distribution diwali kit to ration card holders Jalgaon News)

पाळधी येथील रास्त भाव दुकानदार सोपान पाटील यांच्या दुकानातील लाभार्थ्यांना पालकमंत्री गुलाबराव पाटील यांच्या हस्ते दिवाळी शिधाजिन्नस संच वाटप करण्यात आले. जिल्हाधिकारी अमन मित्तल अध्यक्षस्थानी होते.

या वेळी जिल्हा पुरवठा अधिकारी सुनील सूर्यवंशी, धरणगावत तहसीलदार नितीन देवरे, सहाय्यक जिल्हा पुरवठा अधिकारी प्रशांत कुलकर्णी, जिल्हा परिषद सदस्य प्रतापराव पाटील, गोपाल चौधरी, माजी सभापती मुकुंदराव नन्नवरे व पाळधी येथील रास्त भाव दुकानदार, लाभार्थी उपस्थित होते. जिल्हा पुरवठा अधिकारी सुनील सूर्यवंशी यांनी प्रास्ताविक केले. तहसीलदार नितीन देवरे यांनी आभार मानले.