जळगाव : तालुक्यातील भोकर, पिंप्राळा महसूल मंडळातील २१ गावांना ९, १० जून रोजी आलेल्या वादळी वाऱ्यासह पावसाने (Stormy Rain) दिलेल्या फटक्यामुळे सुमारे २०९१ हेक्टर क्षेत्रावरील पिकांचे (Crops) नुकसान झाले आहे. यात बहुतांश केळीचे (banana) क्षेत्र आहे. या नुकसानीची रविवारी (ता. १२) पालकमंत्री गुलाबराव पाटील (Gulabrao Patil) यांनी बांधावर जाऊन पाहणी करून शेतकऱ्यांशी संवाद साधला. याप्रसंगी अनेक शेतकऱ्यांना आपल्या व्यथा-वेदना सांगताना अश्रू अनावर झाले. पालकमंत्री पाटील यांनी शेतकऱ्यांना धीर देत भरपाई मिळवून देण्याचे आश्‍वासन दिले. (Gulabrao Patil Statement on damaged Agricultural field Jalgaon Nashik News)

रविवारी पालकमंत्री पाटील यांनी गाढोदा, भादली खुर्द, भोकर, पळसोद शिवार, कठोरा, करंज, घार्डी, नांद्रा बुद्रुक, नंदगाव आदींसह परिसरातील शिवारात थेट बांधावर जाऊन नुकसानीची पाहणी केली. प्रांताधिकारी महेश सुधळकर, तहसीलदार नामदेव पाटील, जिल्हा अधीक्षक कृषी अधिकारी संभाजी ठाकूर, पोलिस निरीक्षक रामकृष्ण कुंभार, तालुका कृषी अधिकारी एस. जे. राऊत, मंडळ कृषी अधिकारी एम. जी. जंगले, कृषी सहायिका अनिता जाधव, परिसरातील शेतकरी उपस्थित होते. जिल्हाधिकारी आणि विमा कंपन्यांच्या प्रतिनिधींसह बैठक घेऊन शेतकऱ्यांना तातडीने नुकसान भरपाई मिळवून देण्याची ग्वाही पालकमंत्री पाटील यांनी दिली. शेतकऱ्यांनी काही प्रमाणात का होईना, आपल्या पीक व्यवस्थापनात बदल करावा असे सांगितले. राज्य सरकारने सातत्याने शेतकऱ्यांच्या हिताची भूमिका घेतली असून या आपत्तीच्या काळात शासन आपल्या पाठीशी खंबीरपणे उभे असल्याचे त्यांनी सांगितले.