जळगाव : जिल्ह्यात जर कोणी बेकायदेशीररीत्या बाळ दत्तक घेत असतील किंवा दत्तक देत असतील तर त्यांच्यावर कायदेशीर कारवाई करण्यात येईल, असा इशारा जिल्हा महिला व बाल कल्याण अधिकारी डॉ.वनिता सोनगत यांनी दिला आहे.

बाल न्याय (मुलांची काळजी व संरक्षण) अधिनियम २०१५ व महाराष्ट्र राज्य बाल न्याय (मुलांची काळजी व संरक्षण) नियम २०१८ तसेच केंद्रीय दत्तक संसाधन प्राधिकरण मार्गदर्शक सूचनेनूसार १८ वर्षाखालील कोणतेही बाळ दत्तक घेणे व देणे आवश्यक आहे. काही व्यक्ती व संस्थाकडून समाजातील (विशिष्ट समाजाचा उल्लेख करून) ज्या व्यक्तींना लहान मुल दत्तक घ्यावयाचे असतील किंवा दत्तक म्हणून द्यायचे असतील त्यांनी संपर्क करावा, असा संदेश हॉटसॲपव्दारे तसेच समाजमाध्यमांवर संबंधितांच्या संपर्क क्रमांकासह प्रसारित केला जात आहे.

कोणीही असे बेकायदेशीर बाळ दत्तक घेवू अथवा देवू नये अन्यथा त्यांच्यावर देखील कायदेशीर कारवाई करण्यात येईल. असे प्रकार होत असल्यास जिल्हा महिला व बाल विकास अधिकारी कार्यालय, जळगाव (०२५७ -२२२८८२८), जिल्हा बाल संरक्षण कक्ष (०२५७-२२२८८२५, ८३०८१७७८११, ७२४९११८१६१, ९५०३७५४००७) तसेच चाइल्ड लाईन -१०९८ या हेल्पलाईनशी संपर्क साधावा.