Jalgaon Municipality : महानगरपालिकेने थकबाकीसाठी जाहीर केलेल्या अभय योजनेला जनतेचा प्रचंड प्रतिसाद लाभला आहे. योजनेअंतर्गत ३० हजार ४३६ मालमत्ताधारकांना १२ कोटी ३५ लाख रुपयांची शास्ती माफ झाली आहे. तर ११० कोटीची विक्रमी वसुली झाली. महापालिकेने यावर्षी घरपट्टी थकबाकीदाराकडील वसुली वाढविण्यासाठी अभय शास्ती योजना राबविली यात ७५ हजार १६० मालमत्ताधाकांनी मालमत्तांचा कर भरला आहे. (Jalgaon 110 crores recovered from Municipal Corporation in Abhay Yojana)

त्यात १५ हजार ४०५ मालमत्ताधारकांनी २० कोटी ७५ लक्ष रुपये ऑनलाईन कर भरला. २०२१-२२ आर्थिक वर्षांत महानगरपालिकेची ५६ कोटी रुपये वसुली झाली असून २०२२-२३ मध्ये १०६ कोटी रुपयांची वसुली झाली होती. तर यावर्षी ११० कोटी रुपयांची वसुली झाली आहे.

अभय शास्ती योजनेमुळे वर्षभरात २०४ कोटींपैकी ११० कोटी रुपयांची वसुली झाली आहे. या वर्षींच्या ८५ कोटी ७२ लाखांपैकी ७५ टक्के वसुली झाली आहे. मागील थकबाकी ११८ कोटी ३८ लाख पैकी ४६ कोटींची वसुली झाली आहे. (latest marathi news)

मात्र, अजूनही शहरातील १ लाख ३२ हजार मालमत्ताधारकांपैकी ५६ हजार ८४० मालमत्ताधारकांकडे अद्यापही थकबाकी आहे. महापालिकेतर्फे आता थकबाकी वसुलीसाठी कडक भूमिका घेण्यात येणार असून शास्ती व व्याजासह जप्तीची मोहीम राबविण्यात येणार आहे.

"महापालिकेतर्फे घरपट्टी थकबाकीदारांसाठी दंड व्याज माफीची योजना बंद करण्यात आली आहे. थकबाकीदारांना आता दंड आणि व्याज आकारले जाईल. तसेच त्यांचे नळ कनेक्शन बंद करून त्यांच्या मिळकतीवर जप्तीही आणण्यात येईल."- गणेश चाटे (उपायुक्त महापालिका )