Jalgaon News : पारोळा तालुक्यातील ६९ गावांना फेब्रुवारीत वादळी वाऱ्यासह गारपिटीचा तडाखा बसला होता. रब्बीच्या पिकांचे मोठ्या प्रमाणावर नुकसान झाले होते. या संदर्भात जिल्हाधिकारी आयुष प्रसाद यांनी घेत संबंधित शेतकऱ्यांचे सरसकट पंचनामे करण्याचे आदेश दिले होते. मात्र, पाच महिने उलटूनही नुकसानग्रस्त शेतकऱ्यांना भरपाई मिळाली नाही.

भरपाई मिळावी, अशी मागणी पारोळा व बहादरपूर मंडळासह परिसरातील शेतकऱ्यांनी केली आहे. तालुक्यातील पारोळा व बहादरपूर मंडळातील करंजी बुद्रुक, दळवेल, मोंढाळे प्र. अ., हिवरखेडे, बहादरपूर, शिरसोदे, महाळपूर, रत्ना पिंप्री, होळपिंप्री, दबापिंप्री, वसंत नगर, भोलाणे, भिलाली, आंबापिंप्री, जिराळी, इंधवे या परिसरासह सुमारे ६९ गावांना वादळी पाऊस व गारपिटीचा फटका बसला होता.

यामुळे सुमारे ५२०० हेक्टर क्षेत्र बाधित झाले होते. परिणामी, तब्बल आठ हजार पाचशे शेतकऱ्यांचे मोठ्या प्रमाणात नुकसान झाले होते. तसेच भिलाली येथे आठ शेळ्या, मेंढ्या दगावल्या होत्या. २६ फेब्रुवारी २०२४ ची रात्र परिसरातील शेतकऱ्यांसाठी काळ रात्र ठरली. वादळी व गारपिटीमुळे पिके जमिनदोस्त झाली. (latest marathi news)

असे असताना आजवर बाधित शेतकऱ्यांना भरपाई मिळाली नाही. यासाठी कृषी विभाग व महसूल विभागाने योग्य तो समन्वय साधत भरपाईबाबत पाठपुरावा करावा, अशी मागणी शेतकऱ्यांकडून केली जात आहे.

"फेब्रुवारी रब्बी हंगाम २०२४ या काळात पारोळा व बहादरपूर मंडळासह इतर ठिकाणी गारपीट व अवकाळी पाऊस झाला. या संदर्भात संबंधित बाधित क्षेत्राचे पूर्णपणे पंचनामे झाले आहेत. वरिष्ठांकडे अहवालही पाठविण्यात आला आहे. लवकरच निधी प्राप्त होऊन तो शेतकऱ्यांच्या खात्यात थेट जमा होणार आहे."- दत्तात्रेय ढमाळे तालुका कृषी अधिकारी, कृषी कार्यालय, पारोळा