Jalgaon Anganwadi Sevika : सर्वोच्च न्यायालयाच्या आदेशानुसार ग्रॅच्युइटीची रक्कम मिळावी, म्हणून सुमारे १२२ अंगणवाडी कर्मचाऱ्यांनी धुळे कामगार न्यायालयात दावा दाखल केला होता. न्यायालयात गेलेल्या अंगणवाडी कर्मचाऱ्यांना ग्रॅच्युइटीची रक्कम मिळण्याचा मार्ग मोकळा आहे. जिल्हा परिषदेचे अपील फेटाळत ग्रॅच्युइटीची रक्कम देण्याचा औद्यगीक न्यायालयाने आदेश दिला आहे. (Anganwadi Sevika Clear way for Anganwadi workers to receive gratuity )

महाराष्ट्र राज्य अंगणवाडी कर्मचारी संघटनेने याबाबत पाठपुरावा केला होता. त्या प्रयत्नांना यश आले आहे. धुळे आणि नंदुरबार जिल्ह्यातील निवृत्त झालेल्या, राजीनामा दिलेल्या, तसेच मृत्यू पावलेल्या अंगणवाडीसेविका, मदतनीसांना सर्वोच्च न्यायालयाच्या आदेशानुसार ग्रॅच्युइटीची रक्कम मिळावी, म्हणून सुमारे १२२ अंगणवाडी कर्मचाऱ्यांनी धुळे कामगार न्यायालयात दावा दाखल केला होता.

कामगार न्यायालयाने सेवानिवृत्त झालेल्या, राजीनामा दिलेल्या अंगणवाडी कर्मचारी आणि मृत्यू पावलेल्या अंगणवाडी कर्मचाऱ्यांच्या वारसांना सुप्रीम कोर्टाने ग्रॅच्युइटीची रक्कम अदा करावी, असा आदेश ३० जानेवारी २०२३ ला राज्य शासनासह धुळे आणि नंदुरबार जिल्हा परिषदेला दिला होता. राज्य शासन आणि जिल्हा परिषदेने कामगार न्यायालयाच्या आदेशाची अंमलबजावणी न करता औद्योगीक न्यायालयात अपील दाखल केले होते. (latest marathi news)

अपील प्रकरणी कामगार न्यायालयाच्या आदेशानुसार सेवानिवृत्त झालेल्या, राजीनामा दिलेल्या आणि मृत्यू झालेल्या अंगणवाडी कर्मचाऱ्यांची ग्रॅच्युइटीची एकूण रक्कम आधी कोर्टात जमा करा. त्यानंतरच अपील प्रकरणी कामकाज चालविण्यात येईल, असे म्हणत औद्योगीक न्यायालयाचे न्यायाधीश दीपक एल. भागवत यांनी अपील फेटाळून लावले आहे. त्यामुळे न्यायालयात गेलेल्या अंगणवाडी कर्मचाऱ्यांना ग्रॅच्युइटीची रक्कम मिळण्याचा मार्ग मोकळा झाला असल्याची माहिती संघटनेचे राज्य कार्याध्यक्ष रामकृष्ण बी. पाटील यांनी दिली.

या प्रकरणी ज्येष्ठ विधीज्ञ ॲड. बी. एस. पाटील यांनी कामकाज पाहिले. संघटनेचे कार्याध्यक्ष युवराज बैसाने व रामकृष्ण बी. पाटील यांनी त्यांना कामकाजात सहकार्य केले. संघटनेने केलेल्या प्रयत्नाला यश आले, म्हणून अंगणवाडीसेविका, मदतनीस आणि मिनी अंगणवाडीसेविकांनी कोणाच्याही भूलथापांना बळी न पडता संघटनेच्या पाठीशी खंबीरपणे उभे राहावे, असे आवाहन संघटनेने केले आहे.