जळगाव : भुसावळ भागात बाजारपेठ पोलिस ठाण्याच्या हद्दीतील हॉटेल मध्ये ‘मेथाक्वालोन’ (एमडी) ड्रग्ज विक्रीसाठी आलेल्या एकासह खरेदी करणारा अशा दोघांना पोलिसांनी मंगळवारी (ता.१९) रात्री अटक करून तब्बल ७३ लाखा ८० हजारांचे एम.डी. (मेथाक्वालोन) डग्ज्‌ जप्त केले. यात पोलिसांनी आज पुरवठा करणारा मुंबईच्या म्होरक्याला अटक केली आहे. (Jalgaon Crime Bhusawal 72 Lakh MD along with three arrested Mumbai leading gajaad with dealer for sale marathi news)

जिल्ह्यात गेल्या दीड महिन्यात २७ गावठी पिस्तूल पोलिसांनी जप्त केल्या असून अमली पदार्थाच्या कारवाईवर देखील लक्ष केंद्रित केले आहे. आज आणखी एक मोठी कारवाई करण्यात पोलिसांना यश आले. पोलिस अधीक्षक डॉ.महेश्वर रेड्डी यांनी आज पत्रकार परिषदेत माहिती देताना सांगितले.

भुसावळ उपविभागीय अधिकारी कृष्णात पिंगळे यांना मिळालेल्या गुप्त माहितीनुसार, पोलिसांच्या पथकाने राष्ट्रीय महामार्ग क्रमांक ५३ वर असलेल्या हॉटेल मधुबन जवळून ट्रॅप लावून कुणाल भरत तिवारी (तापी नगर, भुसावळ), जोसेफ जॉन वाडाल्यारेस (कंटेनर यार्ड भुसावळ) या दोघांना ताब्यात घेतले. दोघांची झडती घेतली असता त्यांच्याकडून ९१० ग्रॅम एम.डी. बाजारभावानुसार ७२ लाख ८० हजार इतकी असून यात दोघांना अटक केली.

तिसऱ्याला मुंबईतून अटक

तिसरा संशयित आरोपी दिपेश मुकेश मालवीय (रा. शेर ए पंजाब हॉटेल, वरणगाव रोड भुसावळ) याने विक्रीसाठी पुरवली आहेत असे तपासात निष्पन्न झाले आहे. शिवाय हे ड्रग्ज मुंबईतून आणण्यात आल्याचे समोर आल्यानंतर बाजारपेठ पोलिस ठाण्याच्या पथकाने मुंबईतून एकाला ताब्यात घेतले आहे. तिन्ही संशयितांना न्यायालयात हजर केले असता न्यायालयाने त्यांना २ दिवस पोलिस कोठडीत रवाना केले आहे. उपनिरीक्षक मंगेश जाधव, योगेश महाजन तपास करीत आहे.

पोलिस अधीक्षक महेश्वर रेड्डी व अप्पर अधीक्षक अशोक नखाते यांच्या मार्गदर्शनात श्री पिंगळे, निरीक्षक गजानन पडघन, उपनिरीक्षक मंगेश जाधव यांच्यासह विजय नेरकर, नीलेश चौधरी, रमण सुरळकर,यासीन पिंजारी, प्रशांत सोनार, सचिन चौधरी, योगेश महाजन, परदेशी, जावेद शाह,राहुल वानखेडे, भुषण चौधरी, आढाळे अशांच्या पथकाचा या कारवाईत समावेश होता. स्वतंत्र पथकामार्फत इतर संशयित आरोपीचा शोध सुरु असुन जळगाव ते मुंबई कनेक्शन सह जिल्‍ह्यात इतरत्र कुठे पुरवठा होते यांचाही शोध घेतला जात असल्याचे डॉ.रेड्डी यांनी सांगितले.