Jalgaon Crime News : सोनवद (ता. धरणगाव) येथील ७० वर्षीय वृद्धेला हृदयविकाराचा झटका आला होता. जळगाव शहरातील दोन न्युरोलॉजिस्ट डॉक्टरांनी चुकीचे निदान करून मेंदूत ब्लॉकेज असल्याचे सांगून त्यांच्यावर शास्त्रक्रिया केली. रुग्ण मरणासन्न अवस्थेत पोचली असून, या उपचारासाठी तब्बल साडेआठ लाख रुपये उकळण्यात आले. चुकीच्या उपचाराने रुग्णमहिलेस मृत्यूच्या दाढेत लोटणाऱ्या डॉक्टरांवर कारवाई करावी, यासाठी कुटुंबीयानी जिल्‍हा शल्यचिकित्सक, पोलिस अधीक्षकांना तक्रार दिली आहे. (Jalgaon Crime)

सोनवदचे जितेंद्र जयस्वाल यांच्या आई ललिता आत्माराम जयस्वाल यांना ७ फेब्रुवारीला सकाळी सातला हृदयविकाराचा झटका आला. त्यांना जळगाव शहरातील खासगी रुग्णालयात आणले. डॉक्टरांनी तपासणी अंती ललिता जयस्वाल यांच्या मेंदूमध्ये पाच ब्लॉकेज असल्याचे निदान केले. तेथून दुसऱ्या न्युरोलॉजिस्ट यांच्या रुग्णालयात दाखल करण्यास सांगितले.

तेथे डॉक्टरांनी तातडीने मेंदीची शस्रक्रिया करण्यास सांगितले. शस्त्रक्रियेसाठी साडेपाच लाख रुपये आणि मेडिकल खर्च केला. शस्त्रक्रियामुळे प्रकृती न सुधारता गंभीर होत गेली. (latest marathi news)

अशा परिस्थितीत डॉक्टरांनी त्यांना डिस्चार्ज दिला व नातेवाइकांकडून ऑपरेशनसाठी ५ पाच लाख ५० हजार, तीन लाख ८० हजार, असे नऊ लाख तीस हजार रुपये उकळण्यात आल्याचे तक्रारीत म्हटले आहे.

दरम्यान, पोलिस अधीक्षक डॉ. महेश्वर रेड्डी यांच्या सुचनेनुसार जयस्वाल कुटुंब जिल्हापेठ पोलिस ठाण्यात तक्रार देण्यासाठी आले होते. वैद्यकीय समिती समक्ष उपचारांची चौकशी होऊन गुन्हा दाखल करण्यात येणार असल्याचे पोलिस अधिकाऱ्यांनी सांगितले.