जळगाव : ॲंड्रॉईड मोबाईलद्वारे बनावट चॅटिंग तयार करून व महिलेचा फोटो वापरून त्याचे स्क्रीन शॉट तिच्या भावी पतीला पाठवीत बदनामी केल्याचा प्रकार घडला आहे. याप्रकरणी सायबर पोलिसात गुन्हा दाखल झाला आहे.

पाचोरा तालुक्यातील रहिवासी असलेल्या डॉक्टर तरुणीचा फोटो वापरून त्या वापरत असलेला मोबाईल क्रमांकावरून बनावट चॅटिंग तयार करण्यात आले. चॅटचे स्क्रीन शॉट तयार करून संबंधित महिला डॉक्टरच्या इन्स्टाग्राम अकाऊंटवरुन त्यांच्या भावी पतीला पाठविल्याचा प्रकार ६ ऑगस्ट रोजी उघडकीस आला. संबंधित डॉक्टर तरुणीने तत्काळ सायबर पोलिसात धाव घेत तक्रार दिली. त्यानुसार संशयितांविरुद्ध गुन्हा दाखल करण्यात आला आहे. तपास पोलिस निरीक्षक लिलाधर कानडे करीत आहे.