Jalgaon Municipality News : शहरात वाढत्या तापमानामुळे नागरिक त्रस्त झाले आहेत. शरीरातील पाणी कमी होत असल्याने पाणी पिणे आवश्‍यक आहे. यासाठी महापालिकेने नागरिकांना रस्त्यावर पिण्याच्या थंड पाण्याची १४ ठिकाणी सोय केली आहे. जळगाव जिल्हा दूध संघ यात सहकार्य करणार असून, शहरात जेवढ्या पाणपोई आहेत. त्या ठिकाणी शुद्ध थंड पाणी भरून देण्यात येणार आहे. जळगाव शहराचे तापमान सध्या कमी असले, तरी उन्हाच्या तीव्र झळा जाणवत आहेत. (Jalgaon Municipal drinking water facility on streets)

त्यामुळे शरीरातील पाणी कमी होत आहे. अशा स्थितीत पाणी पिणे गरजेचे आहे. रस्त्यावरून जाणाऱ्या नागरिकांना तातडीने पिण्यासाठी पाणी उपलब्ध व्हावे, यासाठी शहरात पाणपोईची सुविधा करावी, असे आदेश जिल्हाधिकारी आयुष प्रसाद यांनी महापालिकेला दिले आहेत. जिल्हाधिकाऱ्यांचे आदेश प्राप्त होताच जळगाव महापालिकेने शहरातील १४ ठिकाणी नागरिकांसाठी पिण्याच्या पाण्याची सुविधा केली आहे.

१४ ठिकाणी सावलीत पाण्याचे रांजण (माठ) ठेवले आहेत. त्याला लाल कापड गुंडाळाले आहे, तसेच पाणी पिण्यासाठी ग्लासची व्यवस्था केली आहे. जिल्हा दूध संघातर्फे शुध्द थंड पाणी या राजंणात भरण्यात आले आहे. जिल्हा दूध संघाने शहरातील सर्व पाणपोईच्या माठात शुध्द थंड पाणी भरून देण्याची जबाबदारी घेतली आहे. त्यांच्यातर्फे दररोज या राजंणात थंड पाणी भरण्यात येणार आहे. (latest marathi news)

शहरातील चौदा ठिकाणे

महापालिकेने महर्षी दधिची चौक, प्रकाश मेडिकल चौक, श्‍यामाप्रसाद मुखर्जी उद्यान, नेरीनाका स्मशानभूमी, पांझरा पोळ बस स्टॉपजवळ, अजिंठा चौफुली हॉटेल महेंद्राजवळ, स्वातंत्र्य चौक, पोलिस मुख्यालय कंपाउंड वॉलजवळ, रिमांड होमजवळ सुविधा केली आहे.

प्रथमच सुविधा

शहरातील वाढते तापमान लक्षात घेऊन नागरिकांसाठी शासनातर्फे पिण्याच्या पाण्याची सुविधा प्रथमच करण्यात आली आहे. याबाबत जिल्हाधिकाऱ्यांचे आदेश येताच महापालिकेतर्फे हा उपक्रम प्रथमच राबविण्यात आला आहे.