जळगाव : गावातच राहणाऱ्या जावयाने सासऱ्याच्या डोक्यात दगड टाकून गंभीर जखमी केल्याची घटना रात्री साडेदहा वाजेच्या सुमारास घडली. एमआयडीसी पोलिसात जावायाविरुद्ध गुन्हा दाखल झाला आहे. (Latest Marathi News)

जळगाव तालुक्यातील शिरसोली प्र.न. येथील बाळू आत्माराम पाटील शेतकरी आहे. त्यांच्या मुलीचा विवाह दीपक एकनाथ पाटील यांच्यासोबत सहा वर्षांपूर्वी झाला असून ते गावातच राहतात. जावई दीपक पाटील यास दारुचे व्यसन आहे. दारुच्या नशेत तो पत्नीसह सासूला दररोज शिवीगाळ करीत असतो. रक्षाबंधनाच्या सणाला त्याची पत्नी माहेरी आली असल्याने त्याने थेट तेथेच धडक दिली.

पोटात दारु अन्‌ हातात चाकू

यथेच्छ दारु पिल्यानंतर रात्री साडेदहा वाजेच्या सुमारास दीपक पाटील हातात चाकू घेत सासरी धडकला. दार उघडत नाही म्हणून दारावर दगडं मारुन त्याने गोंधळ घातला. घरात शिरण्यापूर्वी सासरे बाळू पाटील यांनी घराबाहेर येत त्याला रोखण्याचा प्रयत्न केला असता त्याने सासऱ्यालाही मारहाण सुरु केली. सोडवणूक करायला आलेल्या सासू अंजनाबाई त्यांनाही मारहाण झाली. जखमींच्या तक्रारीवरून एमआयडीसी पोलिसांत गुन्ह्याची नोंद करण्यात आली आहे.