Jalgaon News : तरसोद ते चिखली महामार्गाच्या चौपदरीकरणात नशिराबादजवळील रेल्वे उड्डाणपुलाचे काम (भुसावळ ते जळगाव) २०२२ पासून रखडले होते. त्या कामास आता सुरवात झाली असून, येत्या सहा महिन्यांत काम पूर्ण होईल, अशी माहिती महामार्ग विभागाच्या सूत्रांनी दिली. तरसोद ते चिखलीदरम्यान महामार्गाच्या चौपदरीकरणाच्या कामाला कोरोनाच्या अनलॉकनंतर ९० टक्के काम पूर्ण झाले आहे. (Jalgaon Stalled work of Nashirabad flyover finally started)

७० ते ८० टक्के काम पूर्ण झाल्यानंतर नशिराबाद टोल नाक्यावर टोल वसुली सुरू झाली. मात्र, या मार्गावरील एका भागाचे उड्डाणपुलाचे काम बाकी होते. सध्या रेल्वे उड्डाणपुलावर एकेरी मार्गाने वाहतूक सुरू आहे. चिखली (ता. मुक्ताईनगर) ते तरसोददरम्यान ८८.७ किलोमीटर लांब अंतराच्या महामागाचे चौपदरीकरणाचे काम आहे.

तरसोद फाट्यापासून मुक्ताईनगर तालुक्यातील चिखलीपर्यंत, म्हणजे विदर्भातील मलकापूरच्या सीमेपर्यंतच्या टप्प्यातील ६३ किलोमीटर लांबीचे काम वेल्स्पन इन्फ्रास्ट्रक्चरला देण्यात आले. या एजन्सीने युद्धपातळीवर काम करत ते पूर्णत्वाकडे नेले आहे. अगदी लॉकडाउनच्या काळातही या कामाची गती वाढवून ते मुदतीत पूर्ण करण्याचे उद्दिष्ट कंपनीने ठेवले. कामाची मुदत ऑक्टोबर २०२१ पर्यंत होती, तरी नशिराबाद टोल नाक्याजवळील रेल्वे उड्डाणपुलाचे काम बाकी आहे. (latest marathi news)

दृष्टिक्षेपात काम

टप्पा : तरसोद ते चिखली

अंतर : ६२.७ किलोमीटर

खर्च : सुमारे ९४८ कोटी

कामाची मुदत : ऑक्टोबर २०२१ पर्यंत

मक्तेदार : वेल्स्पन इन्फ्रा.

"तरसोद ते चिखलीदरम्यान महामार्गाच्या चौपदरीकरणातील नशिराबाद टोल नाक्याजवळील एकेरी बाजूचे रेल्वे मार्गावरील शिल्लक उड्डाणपुलाचे काम महामार्ग प्राधिकरणातर्फे सुरू केले आहे. आगामी सहा महिन्यांत ते पूर्ण करण्याचा प्रयत्न आहे." -रुपेश गायकवाड, प्रोजेक्ट मनेजर, महामार्ग प्राधिकरण