Jalgaon Crime News : रामदेववाडी अपघात प्रकरणात अपघात झाल्यावर कार सोडून पळून गेलेला तिसरा संशयित ध्रुव नीलेश सोनवणे (वय १९, रा. गायत्रीनगर, जळगाव) याला पोलिसांनी अटक केली आहे. तो पुणे येथे जाण्यासाठी निघाला असतानाच पोलिसांनी ताब्यात घेत बेड्या ठोकल्या. त्याला न्यायालयात हजर केले असता २७ मेपर्यंत पोलिस कोठडी सुनावण्यात आली. ( Third arrested after fleeing from car with friends of hit and run case )

जळगाव-पाचोरा रोडवरील रामदेववाडीजवळ मंगळवारी (ता. ७) सुसाट कारने दुचाकीला धडक दिल्याने आईसह दोन मुलांचा व भाचा अशा चार जणांचा मृत्यू झाला होता. दाखल गुन्ह्यात पेालिसांनी १७ दिवसांनंतर अखिलेश संजय पवार व अर्णव अभिषेक कौल या दोघांना गुरुवारी (ता. २३) मुंबईतून ताब्यात घेण्यात आले. त्यांना न्यायालयाने २७ मेपर्यंत पोलिस कोठडी सुनावली होती.

या दोघांबरोबर त्याच कारमध्ये असलेल्या तिसऱ्या तरुणाचे नाव घटना घडल्यापासून समोर आले होते. मात्र, अटकेतील संशयितांच्या जबाबात त्याचे पुन्हा नाव आल्याने पोलिसांनी ध्रुव सोनवणे याला अटक केल्याची माहिती तपासाधिकारी तथा उपविभागीय पोलिस अधिकारी संदीप गावित यांनी दिली. त्याला न्यायालयात हजर केले असता, न्यायालयाने त्याला २७ मेपर्यंत पोलिस कोठडी सुनावली आहे.