अमळनेर : जळगाव जिल्ह्यातील अमळनेर, यावल, एरंडोल तालुक्यासह काही भागांत शुक्रवारी (ता. १२) सायंकाळी पाच ते सहाच्या दरम्यान वादळी वाऱ्यासह पावसाने जोरदार हजेरी लावली. या वेळी शहरात गारपीट देखील झाली. वादळी वाऱ्याचा जोर एवढा होता, की शहरातील अनेक भागात वृक्ष उन्मळून पडले आहेत. शहरासह ग्रामीण भागाचा वीजपुरवठा वादळी वाऱ्यामुळे विस्कळीत झाला आहे. (Jalgaon Unseasonal Rain Hail in Amalner Yawal taluka)

दरम्यान, एरंडोल तालुक्यातील नागदुली शिवारात शेतात काम करणाऱ्या तरुण शेतकऱ्याचा अंगावर वीज कोसळून मृत्यू झाला तर कळमसरे (ता. अमळनेर) येथे देखील झाडावर वीज कोसळली. अमळनेर तालुक्यातील कळमसरे, मारवड, धार, तासखेडा,अंतुर्ली या भागात जोरदार गारपीटीसह अवकाळी पाऊस झाला.

यामुळे गहू, हरभरा, मका या शेतीमालाचे प्रचंड नुकसान झाले असून, शेतकरी पुन्हा एकदा संकटात सापडला आहे. शहरातील न्यू प्लॉट, ढेकू रोड, पिंपळे रोड, प्रताप मिल कंपाउंड, ख्वाजा नगर, तांबेपुरा या भागात झाडे उन्मळून पडली आहेत. वाऱ्याचा जोर एवढा होता की शहरात ठिकठिकाणी लावलेले बॅनर्स, घरावरील छपरे, शेड पडलेले आहेत. तालुक्यासह शहरात कुठेही जीवितहानी झाली नसली तरी आर्थिक नुकसान मोठ्या प्रमाणात झाले असल्याचा अंदाज आहे. (latest marathi news)

यावल तालुक्यात ट्रॅक्टरवर झाड कोसळले

यावल तालुक्यात शुक्रवारी सायंकाळी पाचला जोरदार वादळासह गारांचा पाऊस पडला. तालुक्यातील नायगाव येथे एक झाड कोसळून त्याखाली ट्रॅक्टर दबल्याची माहिती तहसीलदार मोहनमाला नाझीरकर यांनी सांगितली तर किनगाव परिसरासह चुंचाळे, दहिगाव, सावखेडासीम, सातोद, वड्री, यासह सातपुड्याच्या पायथ्याशी असलेल्या गावांना या वादळी पावसाचा फटका बसला आहे.

सुमारे पाऊण तास जोरदार वादळासह पाऊस सुरू होता. सध्या केळी कापणी सुरू असून, अनेक शेतकऱ्यांनी कांदा काढला आहे. वादळी पावसाने केळी, कांदा पिकाचे किती नुकसान झाले, हे मात्र समजू शकले नाही.