गणपूर (ता. चोपडा) : खानदेशात एप्रिल, मे महिन्यात तीव्र झालेल्या उन्हामुळे भूगर्भातील पाणीपातळी बऱ्याच भागात दोन ते तीन मीटरने खालावली असून, शेतकरी आता विहीर कोरणी व नवीन ट्यूबवेल करीत असल्याचे दिसून आले आहे. चोपडा तालुक्यात काही भागात जमिनीखाली दगड असल्याने प्रेशर बोर मशीनच्या साहाय्याने कूपनलिका (ट्यूबवेल) केल्या जातात. तर काही भागात फक्त माती असल्याने मड पंपच्या साहाय्याने ट्यूबवेल केल्या जात आहेत. (Jalgaon Groundwater level decreased due to May summer news)

तालुक्यात विविध भागात पाण्याची खोली वेगवेगळी असून लासूर, चौगाव, चुंचाळे, चहार्डी आदी भागात ट्यूबवेल करताना पाचशे फुटापर्यंत खोल न्यावे लागत असल्याची उदाहरणे आहेत. तर गणपूर, भवाळे व अनेर काठालगत हीच पाणी पातळी वर असल्याने दीडशे ते दोनशे फुटावर मोटार सोडल्यास ट्युबवेल चालत असल्याचे दिसून आले आहे.

तालुक्याच्या पूर्व भागात व दक्षिण भागात पाणी पातळी मध्यम असून तालुक्याचा एकूण विचार करता सुमारे तीनशे ते चारशे फुटापर्यंत बोर करावे लागत असल्याची आजची स्थिती आहे. एप्रिल आणि मे महिन्यात बऱ्याचदा पाणी पातळी खाली जाते. (Latest Marathi News)

यावर्षी आजच्या घडीला पाणीपातळी दोन मीटरने खाली गेली असून, शेतकऱ्यांना ट्यूबवेलमध्ये दोन ते तीन पाईप म्हणजे २० ते ३० फूट पंप सेट खाली सोडावे लागल्याची उदाहरणे आहेत. दरवर्षी पावसाळा संपला की नवीन ट्यूबवेल करण्याच्या कामाला सुरुवात होते. यावर्षी सुद्धा तालुक्यात मोठ्या प्रमाणावर नसले तरी बऱ्याच ट्यूबवेल झाल्याचे दिसून आले आहे.

साधारणपणे शंभर ते एकशे दहा रुपये फूट याप्रमाणे ट्यूबवेलचे दर असून दोन, तीन, चार दिवसांत एका ट्यूबवेलचे काम होत असल्याने तालुक्यात दोन ते तीन ट्यूबवेलच्या गाड्या बोर करताना दिसून येत आहेत. पाणी खोल जात असल्याचे दिवसेंदिवस जाणवत असून, दरवर्षी उन्हाळ्यात खालावणारी पाणी पातळी पावसाळा चांगला झाला की भरून निघते. ती यावर्षीही भरून निघेल अशी अपेक्षा शेतकऱ्यांना आहे.