भुसावळ : तालुक्यातील दीपनगर येथील औष्णिक वीज केंद्र ५०० मेगावॉट गेटसमोरील साकरी शिवारातील निंभोरा बुद्रुक परिसरात ३५० रहिवासी आपल्या कुटुबांसह वास्तव्याला आहेत. येथील नागरिकांना पिण्याचे पाणी वेळवर मिळत नसल्यामुळे येथे तीव्र पाणीटंचाई निर्माण झाली आहे. सांडपाण्याचे डबके ठिकठिकाणी साचल्याने या भागातील नागरिकांचे आरोग्य धोक्यात आले आहे. (Jalgaon Water Shortage Irregular water supply in Nimbhora)

या परिसरात सांडपाणी वाहून नेणारी गटार नसल्यामुळे येवले यांच्या प्लॉटमध्ये परिसरातील नागरिकांच्या घरातील सांडपाणी साचल्याने तलावाचे स्वरूप प्राप्त झाले आहे. यामुळे डेंगी, मलेरियासारख्या डासांची उत्पत्ती झाल्याने परिसरातील नागरिकांना आजाराचे लक्षणे जाणवत आहेत. त्याचप्रमाणे परिसरात रस्त्यांची व्यवस्था नाही.

याबाबत नागरिकांनी निंभोरा ग्रामपंचायतीत तक्रार केली असता, संबंधित परिसर आमच्या ग्रामपंचायत हद्दीत येत नाही, असे उत्तर ग्रामपंचायतीकडून दिले जाते, तर साकरी ग्रामपंचायतीकडे तक्रार केली असता. (latest marathi news)

शासनाचा निधी आला की काम करू, असे फक्त तोंडी आश्वासने मिळतात. यामुळे नागरिकांना नाहक त्रास सहन करावा लागत आहे.

याबाबत संबंधित ग्रामपंचायतीने यावर तोडगा काढला नाही, तर परिसरातील महिला व नागरिक ग्रामपंचायतीवर हंडामोर्चा काढणार, असा इशारा स्थानिक रहिवाशांनी दिला आहे. याबाबत ग्रामपंचायतीला नागरिकांनी निवेदन दिले आहे. याबाबत ग्रामसेवकांना विचारणा केली असता, त्यांनी निवडणूक झाल्यानंतर कामे केली जातील, असे सांगितले.