जळगाव : कानळदा, फुपनगरी व नांद्रा बुद्रूक (ता. जळगाव) येथे एसटी बस (MSRTC Bus) मागील अनेक महिन्यांपासून बंद आहे. अजूनही एसटी बस सुरू झाली नसल्‍यामुळे विद्यार्थी, प्रवाशांची गैरसोय होत आहे. जळगाव शहरात ये-जा करण्यासाठी खासगी प्रवासी वाहतूक सेवेचा आधार घ्यावा लागत आहे. (Kanalada Phupnagari MSRTC bus still closed jalgaon news)

फुपनगरी येथे जाण्यासाठी सकाळी १०, दुपारी ३ व सायंकाळी सहा वाजता जळगाव आगारातून पूर्वी एसटी बस सोडण्यात येत होती. तसेच कानळदा येथे दिवसभरात आठ फेऱ्यांचे नियोजन होते. तसेच दिवसभरात चार वेळेस नांद्रा बुद्रूक येथेही महामंडळाची बस जायची. परंतु कानळदा व फुपनगरी येथे एसटी बस बंद आहे.

१३० विद्यार्थ्यांची रोज ये-जा

कानळदा व फुपनगरी येथील लोकसंख्या मोठी आहे. कानळद्यात सुमारे १४ हजार तर फुपनगरी येथे सुमारे तीन हजार एवढी लोकसंख्या आहे. यात जळगाव शहरात रोज १३० पेक्षा अधिक विद्यार्थी सकाळी, दुपारी कानळदा व फुपनगरी येथून येतात. तसेच इतर प्रवासी, ज्येष्ठ नागरिक देखील कामानिमित्त जळगाव शहरात येतात. परंतु या सर्व मंडळीला बस सुरू नसल्याने खासगी बसचा आधार घ्यावा लागत आहे. यात प्रवाशांची लूट केली जात आहे. अव्वाच्या सव्वा भाडे आकारले जात आहे. यामुळे आर्थिक नुकसान होत आहे.

फाट्यापासून पायपीट

फुपनगरी येथील प्रवाशांना अनेकदा फाट्यावर येऊन खासगी वाहतूक व्यवस्थेचा आधार घ्यावा लागतो. गावापासून फाट्यापर्यंतचे अंतर सुमारे दीड किलोमीटर आहे. एवढे अंतर पायपीट करून जावे लागते. यात वेळ वाया जातो. श्रम अधिक लागतात. विद्यार्थ्यांना वाहनांची प्रतीक्षा करीत थांबावे लागते. ही समस्या दूर करण्यासाठी एसटी बस फुपनगरी, कानळदा व नांद्रा येथे सुरू करावी, अशी मागणी केली जात आहे.