चाळीसगाव : दुचाकी घेण्यासाठी माहेरून दोन लाख रुपये आणावे, या मागणीसाठी विवाहितेचा शारीरिक व मानसिक छळ केल्याप्रकरणी पतीसह सात जणांविरुद्ध गुन्हा दाखल करण्यात आला आहे.

शहरातील एका भागात राहणाऱ्या २५ वर्षीय विवाहितेचा विवाह ऑगस्ट २०२१ मध्ये युक्रांत दिलीप बोरसे (रा. शिरपूर, जि. धुळे) नामक व्यक्तीशी झाला. सुरवातीला पतीसह सासरच्या मंडळींकडून नवविवाहितेला चांगली वागणूक मिळाली. त्यानंतर दुचाकी घेण्यासाठी माहेरून दोन लाख रुपये घेऊन ये, असे सांगून शारीरिक व मानसिक छळाला सुरवात केली.

आई-वडिलांची हालाखीची परिस्थिती असल्याने तिने नकार दिला. त्यावर सासरच्या मंडळींकडून अधिक त्रास दिला जाऊ लागला. या सगळ्या गोष्टींना कंटाळून पीडितेने शहर पोलिस ठाणे गाठून पती युक्रांत दिलीप बोरसे, सासू भारतीबाई दिलीप बोरसे, सासरे दिलीप यशवंत बोरसे यांच्यासह सात जणांविरुद्ध गुन्हा दाखल केला आहे. पोलिस निरीक्षक के. के. पाटील यांच्या निर्देशानुसार किशोर सोनवणे तपास करीत आहे.