जळगाव : एखाद्या सिनेमात शोभावा, अशा पद्धतीने ‘तू माझी नाही झाली तर तुला कोणाचीच होऊ देणार नाही’, असे म्हणत २० वर्षीय विवाहित तरुणीला चाकूचा धाक दाखवून तिचे अपहरण केले. हातात काचेची बॉटल घेत तिच्या वडिलांना धमकावून ठार मारण्याची धमकी दिल्याची थरारक घटना घडली.

शहरातील तालुका पोलिस ठाण्याच्या हद्दीत वास्तव्यास असलेली २० वर्षीय विवाहित तरुणी १२ मेस दुपारी तीनला गुजराल पेट्रोलपंपाकडून घराकडे जात होती. या वेळी निखिल वना सोनवणे (आहुजानगर, निमखेडी, जळगाव) याने दुचाकीने रस्ता अडवून तिला धमकावले. तिच्या हातातील मोबाईल हिसकावून घेतला. त्यानंतर बळजबरी दुचाकीवर बसवून शिवाजीनगर येथील त्याच्या मावशीच्या घरी नेऊन तरुणीला एका खोलीत डांबून ठेवले. पीडितेने प्रसंगावधान राखत गोड बोलून तेथून सुटका करून घेतली.

पहाटे शिरला घरात

निखिल सोनवणे याने दारुच्या नशेत गुरुवारी (ता. १९) पहाटे पीडितेच्या घरी धडक दिली. घराच्या संरक्षकभिंतीवरून उडी मारून तो हातात फोडलेली काचेची बाटली घेतच आत आला. पीडितेच्या वडिलांना जाग आली. त्याने पीडिता व तिच्या वडिलांना ठार मारण्याची धमकी दिली. अखेर भेदरलेल्या अवस्थेत हे कुटुंबीय पोलिस ठाण्यात पोचले. पीडितेच्या फिर्यादीवरून जळगाव तालुका पोलिस ठाण्यात निखिल सोनवणे याच्याविरुद्ध गुन्हा दाखल करण्यात आला आहे. उपनिरीक्षक नयन पाटील तपास करत आहेत.