जळगाव : हरिविठ्ठलनगरातील धनगरवाड्यात कौटुंबीक कलहातून एकाने गळफास घेत आत्महत्या केल्याची घटना घडली. गणेश बडगुजर असे मयताचे नाव असून रामानंदनगर पोलिसांत याप्रकरणी अकस्मीक मृत्यूची नोंद करण्यात आली आहे.

पोलिस व नातेवाईकांनी दिलेल्या माहितीनुसार, शहरातील हरिविठ्ठलनगरातील धनगर वाड्यात गणेश आत्माराम बडगुजर (वय ४८) कुटूंबीयांसह वास्त्यास आहेत. ते इंडिया गॅरेज येथे कामाला होते. गणेश बडगुजर यांच्या लहान मुलीचे लग्न झाल्यानंतर साधारणत: दोन महिन्यापासून कुटुंबात कटकटी सुरु झाल्या होत्या. पती-पत्नीच्या वाद वाढायला नको म्हणून पत्नी प्रतिभा बडगुजर कंटाळून मोठ्या मुलीकडे रहायला गेल्या होत्या. तिथून त्या जैन इरिगेशन येथे कामाला जात होत्या. त्या मोठ्या मुलीसोबत घरी आल्या होत्या. गणेश यांच्यासह बहीण व आई घरीच होते. यावेळी पुन्हा वाद निर्माण होउन भांडणाला सुरवात झाली. गल्लीतील लोकांनी बडगुजर दाम्पत्यास समजविण्याचा प्रयत्न केला. त्यानंतर मात्र, पत्नी व मोठी मुलगी १० वाजता घरातून निघून गेली. या पाठोपाठ मृताची आई व बहिण ही घरातून बाहेर गेल्याने घरात कोणीही नसताना गणेश यांनी गळफास घेतल्याची घटना घडली. बहिणीला सोडून आल्यानंतर मृताची आईने दार उघडताच घरात छोट्याशा दोरीने मुलगा गणेश याने गळफास घेतल्याचा अवस्थेत दिसला, यावेळी आईने एकच आक्रोश केला. शेजाऱ्यांसह गल्लीतील रहिवासी मदतीला धावून आल्यावर त्यांनी रामानंदनगर पोलिसांना घटनेची माहिती दिली. गणेश बडगुजर यांच्या पश्चात आई, पत्नी आणि दोन मुली आहेत.