पारोळा (जळगाव) : कोरोनाने सर्वांचे जनजीवन विस्कळीत झाले आहे. या कठीण काळातून प्रत्येक जण सावरण्याचा प्रयत्न करत आहे. शासन कोरोनाला हद्दपार करणेकामी प्रयत्नशील असून कोरोनाची लस निघाल्याने नागरिकांच्या मनातील भिती दूर झाली आहे. पण आता नागरिकांनी कोरोनाची भिती न बाळगता पोलिओचा डोस आपल्‍या बालकांना द्यावा; असे आवाहन आमदार चिमणराव पाटील यांनी केले.
कुटीर रुग्णालय येथे कृष्णा मराठे यास प्रथम पोलिओ डोस देवुन लसीकरणाचा शुभारंभ करण्यात आला. यावेळी तालुका वैद्यकिय अधिकारी डॉ. प्रांजली पाटील, वैद्यकिय अधिकारी डॉ. योगेश साळुंखे, शिवसेना तालुका प्रमुख प्रा. आर. बी. पाटील, शहर प्रमुख अशोक मराठे, पंकज मराठे, योगेश लोहार यांचेसह कर्मचारी उपस्थित होते. 

पण गाफिल राहू नका
आमदार पाटील म्हणाले, की तालुक्यासह मतदार संघात कोरोनाचा प्रादुर्भाव कमी होतांना दिसत असला तरी नागरिकांनी गाफिल न राहता गर्दीच्या ठिकाणी तोंडाला मास्‍क बांधावा आणि काळजी घ्यावी. पोलिओ लसीकरणाचे शहरात विविध ठिकाणी केंद्र उभारण्यात आली आहे. उर्वरित कर्मचारी यांची टिम शहरात प्रत्येक घरी जाऊन पोलिओ डोस देणार आहे. यासाठी प्रत्येक पालकाने पाच वर्षाआतील बालकांना डोस द्यावा असे ते म्हणाले. यावेळी तालुका आरोग्य कार्यालय व कुटीर रुग्णालय मार्फत पोलिओ डोस नियोजन करण्यात आले आहे. 

संपादन ः राजेश सोनवणे