भुसावळ : भुसावळ शहरासह तालुक्यात वेगवेगळ्या घटनांमध्ये दोघांचा पाण्यात बुडून मृत्यू झाल्याची घटना आज (ता. २४) घडली. पहिल्या घटनेत तापी नदीपात्रात (Tapi River) तरुणाचा तर दुसऱ्या घटनेत मांडवादिगर (ता. भुसावळ) येथे खदाणीच्या पाण्यात मजुराचा (Laborer) बुडून मृत्यू (Drowning death) झाला आहे.

शहरातील तापी नदीकाठालगत अंत्ययात्रा आली असता, मयतावर अंत्यविधी करण्यात आल्यानंतर काही जण तापी नदीपात्रात हातपाय धुण्यासाठी उतरले. यावेळी नदीला जास्त पाणी असल्याने पात्रातील खोलीचा अंदाज न आल्याने अजय राजू वानखेडे (वय. २४, रा. मुस्लीम कॉलनी) या तरुणाचा पाण्यात बुडून मृत्यू झाला. यावेळी नागरिकांनी त्याला वाचविण्याचा प्रयत्न केला. मात्र, त्यांना अपयश आले.

खदानीत बुडून मजुराचा मृत्यू
भुसावळातील काही मजूर मांडवादिगर (ता. भुसावळ) गावातील रस्त्यांच्या कॉंक्रीटीकरणाच्या कामावर गेले होते. काम आटोपून घराकडे निघालेल्या गवंडी मजुरांनी जवळच असलेल्या खदाणीच्या पाण्यात हायपाय धुतले. यावेळी अब्दुल इब्राहिम शाह (वय २८, रा. दिनदयाल नगर, भुसावळ) यांचा खदानीत पाय घसरुन पाण्यात बुडून मृत्यू झाला. सहकारी मजुरांनी तात्काळ त्यांना पाण्यातून बाहेर काढून वाचविण्याचा प्रयत्न केला. मात्र त्यांचा जागीच मृत्यू झाला. याबाबत तालुका पोलिसांना माहिती देण्यात आली असून, घटनेची माहिती मिळताच येथिल नगरसेवक पिंटू (महेंद्रसिंह) ठाकूर यांच्यासह कार्यकर्त्यांनी रुग्णवाहिकेसह घटनास्थळी धाव घेतली. व रुग्णवाहिकेतून मृतक अब्दुल यांचा मृतदेह शवविच्छेदनासाठी भुसावळात आणण्यात आला.