चाळीसगाव:: चाळीसगाव शहरातील कोव्हीड केअर सेंटरमध्ये काम करणाऱ्या नर्सला व खाजगी दवाखान्यातील कंपाऊडरला कोरानाची लागण झाली आहे. तालुक्यात कोरानाची लागण रोखण्यासाठी प्रशासनाला अपयश येत असल्याचे दिसत आहे. तालुक्यात कोराना बाधितांचा आकडा १६ वर गेल्याने खळबळ उडाली आहे.

हेपण वाचा - धुळ्यात चार महिला डॉक्‍टर कोरोना विषाणूच्या विळख्यात 
 

चाळीसगाव तालुक्यात कोराना रुग्णांची संख्या हळूहळू वाढत आहे. काल (ता.६) डोण (ता.चाळीसगाव) येथील दोन महिलांना कोरोनाची लागण  झाल्याचे निष्पन्न झाले होते. आज (ता.७) पुन्हा चाळीसगाव शहरातील कोव्हिड केअर सेन्टरमध्ये काम करणाऱ्या नर्स व खाजगी रुग्णालयातील कंपाऊडर यांना कोरोनाची बाधा झाली असल्याचे उघड झाले आहे. .त्यांच्या स्वॅबचा तपासणीचा अहवाल रात्री उशिरा पॉझिटिव्ह आल्याची माहिती तालुका वैद्यकिय आधिकारी डॉ.डी.के. लांडे यांनी दिली. कोरोनाग्रस्त आढळून आलेल्यांमध्ये एक शहरातील हनुमानवाडी तर दुसरा करगाव रोड येथे राहत असल्याची माहिती प्राप्त झाली आहे. कोरोना बाधितांच्या घरांची पाहणी तहसीलदार अमोल मोरे, डॉ.डि.के.लांडे यांनी केली असून तो परिसर कन्टेनमेंट झोन म्हणून घोषीत केला. शहारातील दोघे कोरोना बाधिताच्या संपर्कात आलेल्या १५ जणांना क्वारंटाईन करण्याची प्रकिया सुरु असून त्यांचे स्वॅब घेवून ते जळगाव येथे तपासणीसाठी पाठविण्यात येणार आहेत.

आरोग्य खात्यात चाललय तरी  काय ? 
चाळीसगाव तालुक्यातील आरोग्य खात्यातील कर्मचारी आपली सेवा बजावत आहे. चाळीसगाव कोव्हीड केअर सेंटरमध्ये शालेय आरोग्य पथकातील पाच महीला कर्मचारी, याच पथकातील डाँक्टर तपासणी नमुने घेण्यासाठी येथे कार्यरत आहेत. पथकातील नर्सला कोरानाची लागण झाली आहे. आरोग्य कर्मचारी यांचेच आरोग्य धोक्यात आल्याने सर्वसामान्य नागरीकांचे काय? असा प्रश्न उपस्थित होत आहे.यामुळे चाळीसगाव तालुक्यातील आरोग्य विभागात मोठा सावळा गोंधळ सुरू असल्याची चर्चा सुरू आहे.