जळगाव ः जळगावकरांचे नेहमीच आकर्षण असलेला मेहरूण तलाव (Mehrun Lake) नुकत्याच झालेल्या मुसळधारेने (Heavy Rain) शंभर टक्के भरला आहे. तलाव शंभर टक्के भरल्यानंतर आता तलावाच्या सांडव्यावरून पाणी पडताना होणारा खळखळ आवाज व विलोभनीय दृश्य पाहण्यासाठी जळगावकरांची मेहरूण तलावाभोवती गर्दी होत आहे.

यंदा जुलै, ऑगस्टमध्ये अत्यल्प पाऊस झाला होता. यंदा मेहरूण तलाव पूर्णतः भरेल की नाही याबाबत शंका होती. मात्र सप्टेंबरमध्ये झालेल्या पावसाने तलाव अर्धा भरला. ‘गुलाब’ वादळाच्या प्रभावाने शहरात झालेल्या पावसाने तलाव पूर्णतः भरला असून, सांडव्यावरून पाणी वाहत आहे. मेहरूण तलावाभोवती अनेक झाडे लावण्यात आली आहेत.

काही अंतरावर उंच इमारतही आहेत. शांत व निसर्गरम्य वातावरणामुळे तलावाकाठी दररोज अनेक पर्यटक, जळगावकर नागरिक हजेरी लावतात. तलावाभोवती काही ठिकाणी बसण्यासाठी बाक ठेवण्यात आले आहेत. त्यावरून बसून तलावाचे, सभोवतालचे सौंदर्य डोळ्यात साठवितात. आतातर तलावच शंभर टक्के भरल्यास नागरिकांची तलावाचे पाणी व सांडव्यावरून पडणाऱ्या पाण्याचे मनमोहक दृश्य पाहण्यासाठी गर्दी होताना दिसते.