जळगाव : शासकीय वैद्यकीय महाविद्यालयातील कोविड कक्षात दाखल दोघा कोरोनाबाधित महिलांची सुखरूप प्रसूती झाली. दोघांनी दोन गोंडस बाळांना जन्म दिला आहे. या बाळांचे स्वॅब तपासणीसाठी पाठविले आहेत. 

हेपण वाचा - "गोइंग टू द लॉन्ग जर्नी' स्टेटस्‌ ठेवले अन्‌ अवघ्या काही मिनिटातच...

बाळाच्या मानेभोवती होते वेढे 
एक महिला तांबापुरा येथील रहिवासी असून, १ जुलैस तिचा अहवाल पॉझिटिव्ह आल्याने जिल्हा रुग्णालयात दाखल झाली होती. बुधवारी दुपारी महिलेस तीव्र कळा जाणवायला लागल्या. याबाबत स्त्रीरोग विभागप्रमुख डॉ. संजय बनसोडे यांना माहिती मिळाल्यानंतर ते तातडीने दाखल झाले व या महिलेची नॉर्मल प्रसूती केली. बाळाच्या मानेभोवती नाळेचे दोन वेढे होते, ते यशस्वीपणे काढण्यात आले व बाळाला बालरोग तज्ज्ञाकडे दाखल करण्यात आले. 

नक्‍की वाचा - फडणवीसांना कुरकूरीत खाण्याची झाली इच्छा...आणि मग पुढे झाले काय...!
 

‘क्विक इन क्विक आउट’द्वारे सीझर
दुसऱ्या एका केसमध्ये निमखेडी येथील रहिवासी महिला ४ जुलैस दाखल झाली होती. गुरुवारी (ता. ९) दुपारी या महिलेस तीव्र कळा जाणवायला लागल्या. बाळाचे वजनही जास्त होते. त्यामुळे महिलेचे सीझर करणे गरजेचे होते. तसा निर्णय डॉ. बनसोडे यांनी घेतला व ‘क्विक इन क्विक आउट’ या प्रणालीद्वारे यशस्वीपणे सीझर केले. या बाळाच्या मानेभोवतीही नाळेचे तीन वेढे होते, ते काढण्यात आले. बाळास बालरोग तज्ज्ञाकडे दाखल केले आहे. दोन्ही बाळांच्या स्वॅब तपासणीसाठी पाठविले आहेत. सद्य:स्थितीत दोन्ही माता व बाळांची प्रकृती स्थिर आहे. 

 
दोन्ही कोरोनाबाधित महिलांची सुखरूप प्रसूती झाली आहे. बाळांचे स्वॅब तपासणीसाठी पाठविले असून, त्यांच्यावर योग्य ते उपचारही सुरू आहेत. आमच्या टीमचे त्याबद्दल अभिनंदन. 
-डॉ. संजय बनसोडे, विभागप्रमुख, स्त्रीरोग व प्रसूती विभाग, शासकीय वैद्यकीय महाविद्यालय