जळगाव ः जिल्ह्यात सात जूनपासून कोरोना (corona) निर्बंध पूर्णपणे हटविण्यात आले. नंतर मात्र गेल्या सोमवारपासून (ता.२८ जून) सायंकाळी पाच ते पहाटे पाच अशी संचार बंदी (Curfew) जाहीर करण्यात आली. मात्र जळगाव शहरातील काही भाग, जिल्हयातील ग्रामीण भाग, भुसावळ शहरात या संचारबंदीला हारताळ फासल्याचे दिसून येते. सायंकाळी सहानंतर अनावश्‍यकरित्या अनेक जण बिनधास्त फिरतात. भुसावळला तर दूपारी चारनंतरही अर्धे शटर उघडे करून करून दुकाने असल्याचे चित्र आहे. (jalgaon district citizen corona curfew rules not follow)

गेल्या सोमवारपासून अत्यावश्‍यक दुकाने वगळता सर्व प्रकारचे दुकाने सकाळी सात ते दूपारी चार पर्यंत सुरू ठेवावयाची आहेत. सायंकाळी पाच नंतर पहाटे पाचपर्यंत संचारबंदी आहे. यात अत्यावश्‍यक कारणांशिवाय कोणाला बाहेर फिरता येणार नाही. याची जबाबदारी संबंधित महापालिका, नगरपालिका, ग्रामपंचायतीवर आहे.

जळगाव शहरात टॉवर चौक, आकाशवाणी चौकात येणाऱ्या जाणाऱ्यांची पोलिस तपासणी करतात. मात्र अनेक लोटगाड्यांवर फळविक्रेते कॉलन्या कॉलन्यात गर्दी जमा करून फळे विकताना दिसतात. विशेष म्हणजे त्यांच्या तोंडावर मास्कही नसते. कालिका माता मंदिराजवळील कोल्हे विद्यालयाजवळ भाजी विक्रेत्यांजवळ नागरिकांची गर्दी रोजच होते. पिंप्राळा गुजराल पेट्रोल पंप, समता नगर, तांबापूरा येथील चित्रही तसेच आहे. नशिराबाद गावात डेअरीवर गर्दी असते. गावात नागरिकांची ये-जा सुरूच असते.

भुसावळला जामनेररोडवरील व्यापारी संकूलातील काही दुकाने अर्धवट शटर उघडून सुरू असतात. नाहाटा महाविद्यालयासमोरील विविध खाद्य पदार्थ, लोट गाड्यावरील पदार्थाचे दुकाने सुरू असतात. विशेष म्हणजे रोज सायंकाळी येथे वाहतुकीची कोंडी होते. एवढी गर्दी येथे असते.
शहरात विविध ठिकाणी नागरिक मनसोक्त फिरत असतात. वाहतूक पोलिस मात्र बघ्याची भुमिका घेतात.