जळगाव : जिल्ह्यात गेल्या दोन महिन्यांपासून सातत्याने रुग्णसंख्या घटत असताना शुक्रवारी बरे होणाऱ्यांपेक्षा नव्याने आढळून आलेले रुग्ण (corona) अधिक होते. जिल्ह्यात समोर आलेल्या ८ पैकी ५ रुग्ण बोदवड तालुक्यातील असल्याने चिंता वाढली आहे. तर अवघे दोनच रुग्ण आज बरे झाले, त्यामुळे सक्रिय रुग्णही (Active Patient) वाढले आहेत.

जळगाव जिल्ह्यात दोन महिन्यांपासून कोरोनाचा संसर्ग नियंत्रणात आहे. गेल्या काही दिवसांत तर सातत्याने नवे रुग्ण कमी व बरे होणारे अधिक असे चित्र कायम होते. त्यामुळे सक्रिय रुग्णसंख्या लक्षणीयरित्या घटली होती.

शुक्रवारी मात्र पुन्हा नव्या ८ रुग्णांची जिल्ह्यात भर पडली. त्यामुळे एकूण रुग्णसंख्या १ लाख ४२ हजार ६५४ झाली. दिवसभरात केवळ २ रुग्ण बरे झाले. बरे होणाऱ्यांचा आकडा १ लाख ४० हजार ४६पर्यंत पोचला असून हे प्रमाण ९८.१७ टक्के आहे. आज ३ हजार २९६ चाचण्यांचे अहवाल प्राप्त झालेत. शुक्रवारी बोदवडला ५, चोपडा २ व भडगावात १ रुग्ण आढळून आला.