जळगाव : कोरोना व्हायरसचा संसर्ग वाढत असून, बाधित रूग्णांवर तात्काळ उपचार होण्यासाठी राज्याचे पर्यटन व पर्यावरणमंत्री आदित्य ठाकरे मदतीला धावून आले. जळगाव जिल्ह्यासाठी पाच ऑक्‍सिजन कॉन्संट्रेटर यंत्र उपलब्ध करून दिले आहेत. 

आवर्जून वाचा - अबब... जळगाव जिल्ह्यात कोरोनाचे 23 हजार रुग्ण वाढणार 

शहरासह जिल्ह्यातील नागरिकांसाठी शिवसेना व युवासेना मदतीसाठी धावून आले असून शिवसेनेचे उपनेते व पाणी पुरवठामंत्री तथा जळगाव जिल्ह्याचे पालकमंत्री गुलाबराव पाटील यांच्या पाठपुराव्यातून शिवसेना नेते तथा पर्यटन व पर्यावरणमंत्री आदित्य ठाकरे यांनी जळगाव जिल्ह्यासाठी पाच ऑक्‍सीजन कॉन्संट्रेटर यंत्र उपलब्ध करून दिले आहेत. पालकमंत्री गुलाबराव पाटील यांच्या हस्ते जिल्हा शासकीय रुग्णालयात हे पाच ऑक्‍सिजन कॉन्संट्रेटर जिल्हाधिकारी अभिजित राऊत व शासकीय वैद्यकीय महाविद्यालयाचे अधिष्ठाता जयप्रकाश रामानंद यांच्याकडे सुपूर्द करण्यात आले. सदर ऑक्‍सीजनचे यंत्र हे जळगाव, भुसावळ या कोरोना हॉटस्पॉट असलेल्या ठिकाणी उपयोगी पडणार आहे. यावेळी पर्यटन व पर्यावरण मंत्री आदित्य ठाकरे यांचे जिल्हावासीयांतर्फे मंत्री गुलाबराव पाटील यांनी आभार व्यक्त केले. 

पन्नास रूग्णांना मिळणार लाभ 
कोरोना पॉझिटीव्ह असलेले रूग्णांला एखाद्यावेळी ऑक्‍सिजनची आवश्‍यकता पडत असते. बहुतांश वेळी ऑक्‍सिजन न मिळाल्यास मृत्यू होण्याची शक्‍यता आहे. परंतु एका ऑक्‍सिजन कॉन्संट्रेटर मशीनमुळे एकाच वेळी 10 रुग्णांना ऑक्‍सीजन उपलब्ध होतो. पाच यंत्रांमुळे एकाच वेळी 50 रुग्णांना त्याचा लाभ मिळणार आहे.