वाकोद (ता. जामनेर) : औरंगाबादच्या (Aurangabad) दौऱ्यावर असताना जगप्रसिद्ध अजिंठा लेणी (Ajanta Caves) येथे खासदार सुप्रिया सुळे (MP Supriya Sule) यांनी नुकतीच भेट दिली होती. त्यावेळी येथील अजिंठा - जळगाव महामार्गादरम्यान अजिंठा घाटातील रस्त्याची दुरवस्था प्रकर्षाने जाणवली. या लेण्यांना जगभरातून दरवर्षी मोठ्या संख्येने पर्यटक भेट देतात. त्यासोबतच येथील स्थानिकांसाठी देखील हा रस्ता दुरुस्त होणे आवश्यक आहे, अशी खंत पुणे येथील एका कार्यक्रमात खासदार सुळे यांनी केंद्रीय मंत्री नितीन गडकरी ( Central Minister Nitin Gadkari) यांच्याकडे व्यक्त केली होती.

याबद्दल केंद्रीय रस्ते वाहतूक व महामार्ग मंत्री नितीन गडकरी यांना कात्रज उड्डाणपुलाच्या भूमिपूजन व लोकार्पण कार्यक्रमात भेटून चर्चा केली व हा रस्ता दुरुस्त करण्याची मागणी केली. या वेळी हा रस्ता एकूण १५० किमी लांबीचा चौपदरी असून, यापैकी ११० किमी काम पूर्ण झाले आहे. अशी देखील माहिती मंत्री गडकरी यांनी दिली.

तसेच जळगाव औरंगाबाद महामार्गावरील सर्वांत मोठी डोकेदुखी ठरलेले अजिंठा घाटातील रस्ता खूपच नादुरुस्त असून, याबाबत माहिती देताना त्यानी सांगितले, की नुकतीच मार्च महिन्यात वन विभागाची ना हरकत मिळाली असून, डिसेंबरअखेर हे काम पूर्ण करणार असल्याचे मंत्री गडकरी यांनी सांगितले. या रस्त्याबाबतचे म्हणणे ऐकून त्यावर तातडीने उत्तर दिल्याबद्दल गडकरी यांचे मनापासून आभार. तसेच या रस्त्यावरुन नेहमीच मोठी हस्ती जात असतात परंतु खासदार सुळे यांनी या समस्येकडे मंत्री महोदयांचे लक्ष वेधले.