पाचोरा (जळगाव) : लोहारी (ता. पाचोरा) येथील शेतकऱ्याने शेतीकामासाठी आवश्यक असलेली बैलजोडी घेतली. याकरीता पत्नीचे सोन्याचे दागिने विकले आणि उन्हाळ्यातच नवी बैलजोडी घेतली. पण एक हंगाम देखील घेतला नाही तोच बैलजोडीवर विजेची तार पडल्‍याने दोन्ही बैल मृत झाल्याची घटना घडली.

अवश्‍य वाचा - ते दृश्‍य पाहून शेतकरी बेशुद्ध; लाखोचे आद्रक पाण्यात
 

लोहारी येथील गोविंद पाटील या अल्पभूधारक शेतकऱ्याने यावर्षी चांगले उत्पन्न घेता यावे; तसेच घराला हातभार म्‍हणून दुसऱ्याच्या शेतात जावून मजुरी मिळविता येईल. म्हणून बैल जोडी विकत घेण्याचा निर्धार केला. पण बैलजोडी घेण्यासाठी हाती पैसा नव्हता. बैलजोडी घेणे गरजेचे असल्याने त्यांनी पत्नीच्या अंगावरील सोन्याचे दागिने विकले व बैलजोडी घेतली. परंतु अवघ्या दीड महिन्यातच शेतात जात असताना रस्त्याच्या बाजूला असलेल्या विजेच्या खांबावरील तार बैलजोडीच्या अंगावर पडल्याने दोन्ही बैल मृत झाले .तर बैलगाडीवर असलेला त्यांचा मुलगा विजेच्या शॉकने फेकला जाऊन जखमी झाला. 

शेतीच्या कामांचा प्रश्‍न
सदर घटनेमुळे गोविंद पाटील यांच्यासमोर अंधःकार पसरला असून तहसीलदार कैलास चावडे यांनी घटनेचा पंचनामा केला. बैलजोडीचे शवविच्छेदन ही करण्यात आले असून वीज कंपनीच्या गलथान कारभारामुळे हा प्रकार घडल्याचे गोविंद पाटील यांनी सांगितले. आता बैलजोडी अभावी पुढील शेतीची कामे कशी करावी? हा प्रश्न समोर असल्याने शासनाने नुकसान भरपाई देवुन न्याय द्यावा आर्त विनवणी गोविंद पाटील यांनी केली आहे.

संपादन ः राजेश सोनवणे