पारोळा ः येथील धरणगाव रस्त्यालगत असलेल्या पिंपरखेड मारुती मंदिराजवळ रात्री दहा वाजेच्या सुमारास पोलिसांनी (Parola Police Station) वाहन तपासणी करीत असताना धरणगाव येथील सतीश रमेश पाटील यांची टेम्पोची तपासणीत तीन लाख 66 हजार रुपये किमतीचा गुटखा (Gutkha) व दीड लाख रुपये किमतीचा टेम्पो मिळून आल्याने आरोपीस गुटक्यासह ताब्यात घेतल्याची घटना रात्री अकरा वाजेच्या सुमारास घडली.

याबाबत पोलीस निरीक्षक संतोष भंडारे, सपोनि निलेश गायकवाड, हवलदार बापू पारधी, सत्यवान पवार ,महेश पाटील, अशांनी पारोळा धरणगाव रस्त्यावरील पिंपरखेड मारुती मंदिराजवळ सरकारी पोलीस गाडी साईडला लावून गाड्यांची तपासणी करीत असताना धरणगाव कडून येणारा महिंद्रा टेम्पो क्रमांक एम एच 19- बी. एम. 4957 वरील चालक सतीश रमेश पाटील (वय 38) रा. राममंदिर समोर धरणगाव याची तपासणी केली असता गाडीत विमल गुटखा, तंबाखू सुगंधी गुटखा असे एकूण आठ गोणपाट व आठ गोणी भरलेले असे एकूण तीन लाख 66 हजार ऐंशी रुपयाचा गुटखा तर एक लाख पन्नास हजाराचे टेम्पो असा रात्री जप्त करण्यात आला आहे. पारोळ्यात ही पहिलीच सर्वात मोठी कारवाई आहे.

सदर गुटखा हा माल गाडी भाडे हजार रुपये देऊन भटू मराठे धरणगाव यांनी पारोळा येथील कैलास चौधरी यांच्याकडे पोहच करण्यास सांगितले असल्याचे टेम्पो चालक सतीश पाटील यांनी पोलिसांना सांगितले. याबाबत पोलीस नाईक प्रवीण रमेश पारधी यांनी पोलिस ठाण्यात फिर्याद दिल्यावरून सतीश रमेश पाटील या विरुद्ध शासनाने गुटखा बंदी केलेली असताना देखील अवैधरित्या गुटखा वाहतूक करताना मिळाल्याने अन्नसुरक्षा कायद्यान्वये गुन्हा दाखल करण्यात आला असून तपास सहाय्यक पोलीस निरीक्षक निलेश गायकवाड हे करीत आहेत.