पारोळा : सध्या कोरोनामुळे पोलिसांना अनेक समस्यांना सामोरे जावे लागत आहे. यासाठी कोणत्याही पोलिस कर्मचाऱ्यास ताप, खोकला असेल तर ड्यूटीवर न येता यावर तत्काळ उपचार घ्या, मानसिक खचून न जाता आत्मविश्वास वाढवा. पोलिसांकडून तक्रारदाराचे समाधान होणे गरजेचे असून, कोणताही गुन्हा किरकोळ न समजता त्याचा गांभीर्यपूर्वक विचार करण्याची गरज असल्याचे नूतन जिल्हा पोलिस अधीक्षक डॉ. प्रवीण मुंडे यांनी सांगितले. 

आवश्य वाचा- केळी प्रश्नाबाबत खासदार रक्षा खडसेंनी घेतली देवेंद्र फडणवीस यांची भेट 

शुक्रवारी सायंकाळी सहाच्या सुमारास त्यांनी पारोळा पोलिस ठाण्याला भेट दिली. त्या वेळी त्यांनी पोलिस कर्मचाऱ्यांना मार्गदर्शन केले. या वेळी अमळनेर विभागीय पोलिस उपअधीक्षक राकेश जाधव, पोलिस निरीक्षक लीलाधर कानडे, सहाय्यक पोलिस निरीक्षक रवींद्र बागूल, नीलेश गायकवाड यांच्यासह पोलिस कर्मचारी उपस्थित होते. 

डॉ. मुंडे म्हणाले, की तीन-चार महिन्यांत लस येईल, अशी अपेक्षा आहे. एसीबी ट्रॅप या गोष्टीकडे गांभीर्याने पाहा, आपल्या मागे कुटुंब असते. त्यामुळे कृती करताना तिचा गांभीर्याने विचार करा. आंतरजिल्हा बदलीसाठी एक महिना माझ्याकडे येऊ नका, मी शक्य ती मदत करेन. काहीही कोणाला पैसे वगैरे देण्याचा प्रयत्न करू नका. तक्रारदारांना चांगली वागणूक द्या, चोर-दरोडेखोरांना धडा शिकवा, फिर्यादीची फिरवाफिरव करू नका, मी स्वतः एखाद्या फिर्यादीला फोन करेन व चूक आढळल्यास तत्काळ संबंधित कर्मचाऱ्याला दंड देण्यात येईल, असा दमदेखील मुंडे यांनी पोलिस कर्मचाऱ्यांना भरला. 

वाचा- जळगाव जिल्ह्यात आज कोरोनाची तीन महिन्यातील सर्वात निचांकी रुग्ण संख्या 

या वेळी मच्छिंद्र भारती, अशोक कुणबी, प्रकाश चौधरी, अनिल वाघ, विजय शिंदे आदींनी तक्रारी मांडल्या. त्यात विजय शिंदे यांनी पोलिस ठाण्यात संगणक अपूर्ण असल्याची माहिती दिली. त्यावर अधीक्षकांनी परवानगी घेऊन आमदार व खासदार निधीतून किंवा लोकसहभागातून कॉम्प्युटर मिळवून घ्या. सध्या परिस्थिती गंभीर असल्याचे सांगितले. 
 

संपादन- भूषण श्रीखंडे