रावेर : तालुक्यातील विवरा खुर्द येथे शेतात विहिरीवर वीज पडून (Lightning Strikes) शेतमजूर महिला जागीच ठार (Death) झाल्याची घटना दुपारी चारच्या सुमारास घडली. सुदैवाने शेजारीच असलेली भाची आणि २ मुले यांना कोणतीही इजा झाली नाही. या

बाबतची अधिक माहिती अशी की, विवरे खुर्द येथील माजी सरपंच कविता राजेंद्र पाटील यांच्या शेतात वाघेला हे आदिवासी शेतमजूर कुटुंब झोपडीतच रहात होते. दुपारी चारला पावसाला सुरुवात झाली. त्यावेळी नूरकी वाघेला (वय ३५ वर्ष) ही महिला शेजारच्याच विहिरीवर गेली असता तिच्या अंगावर वीज कोसळून ती जागीच ठार झाली.

शेजारीच असलेल्या झोपडीत तिची भाची रोशनी ( वय ९ वर्षे), मुलगा राहुल (वय ७ वर्षे) आणि मुलगी रवीना ( वय ३ वर्ष) यांना सुदैवाने कोणतीही इजा झाली नाही. याच शेतात दुसऱ्या बाजूला काम करणारा तिचा पती देखील सुदैवाने बचावला आहे. वीज पडलेला महिलेला तातडीने रावेर येथील ग्रामीण रुग्णालयात आणण्यात आले. मात्र तत्पूर्वीच तिचे निधन झाल्याचे डॉक्टरांनी जाहीर केले.