यावल  : येथील एकात्मिक आदिवासी विकास प्रकल्प कार्यालयामार्फत शिलाई मशिन, शिवणकाम प्रशिक्षण देण्याच्या नावाखाली आदिवासी युवक, युवतींसह प्रकल्प कार्यालयाची सुमारे १४ लाखांची फसवणूक केल्याची धक्कादायक घटना घडली. या प्रकरणी गुन्हा दाखल झाला आहे.

आवश्य वाचा- रेमडेसिव्हिरचे तीन हजार डोस मिळणार;मंत्री शिंगणेंची ग्वाही 
 

येथील एकात्मिक आदिवासी विकास प्रकल्प कार्यालयाच्या माध्यमातून कौशल्य विकास कार्यक्रमांतर्गत ४ मार्च २०१४ ते २८ सप्टेंबर २०१७ या कालावधीत औरंगाबाद येथील क्रांतिज्योती प्रमिला चव्हाण महिला मंडळास अटी-शर्तीच्या अधीन राहून ११८ आदिवासी युवक व युवतींसाठी शिवणकाम व शिवणकामाच्या तीन महिन्यांच्या प्रशिक्षणासाठी नऊ हजार ७०० प्रतिविद्यार्थ्याप्रमाणे ११ लाख ४४ हजार ६०० रुपये देण्यात आले होते. प्रत्यक्षात मात्र या मंडळाने आदिवासी युवक, युवतींना कोणतेही प्रशिक्षण न देता व शिलाई मशिन वितरित न करता व कुठलेही प्रमाणपत्र न देता, एक दिवस शाळेची निवड करून एका हॉलमध्ये लाभार्थ्यांना बसवून त्यांचे छायाचित्र काढून प्राशिक्षण दिले व शिलाई मशिन वितरित केल्याचे दाखवून गोरगरीब आदिवासी लाभार्थ्यांची फसवणूक केली.

आवर्जून वाचा- कलियुगातील आधुनिक श्रावण बाळाचा असाही शेवट 
 

या संदर्भात आदिवासी एकात्मिक विकास कार्यालयाचे सहाय्यक प्रकल्प अधिकारी नामदेव भुजंगराव झंपलवाड यांनी दिलेल्या फिर्यादीवरून येथील पोलिसांत क्रांतिज्योत प्रमिलाजी महिला मंडळाच्या सचिव चंद्रकला शिवाजी जाधव (रा. लोहारा, पो. मंगरूळ, ता. मानवत, जि. परभणी) व शिवाजी रमेश जाधव (दक्षिण विहार अपार्टमेंट, कांचनवाडी, पैठण रोड, औरंगाबाद) यांच्याविरुद्ध शासकीय निधीचा गैरव्यवहार करून शासन व आदिवासींच्या फसवणुकीचा गुन्हा दाखल झाला आहे. पोलिस निरीक्षक सुधीर पाटील यांच्या मार्गदर्शनाखाली पोलिस उपनिरीक्षक जितेंद्र खैरनार, पोलिस कर्मचारी संजय तायडे तपास करीत आहेत.

संपादन- भूषण श्रीखंडे