यावल: येथे फैजपूर रोडवर महाविद्यालयाजवळ रिक्षाचे पुढील चाकाचे टायर फूटून झालेल्या अपघातात (Accident) तीन जण जखमी झाले. यातील दोघांची प्रकृती चिंताजनक आहे. हा अपघात शुक्रवारी सकाळी सुमारास महाविद्यालयाजवळ घडला.

मुक्ताईनगर येथील दाम्पत्य निवृत्ती पुंडलिक पाटील ( वय ४२) व त्यांच्या पत्नी शारदा निवृत्ती पाटील हे दुचाकीद्वारे श्री क्षेत्र मनुदेवी (Shri Kshetra Manudevi) येथे जात असतांना समोरून फैजपूरकडे महेंद्र कोळी ( वय ३२,रा. अट्रावल) हे रिक्षा घेऊन जात असलेल्या रिक्षाचे पुढील चाकाचे टायर फुटून रिक्षाचे नियंत्रण सुटून रिक्षा थेट समोरून येणाऱ्या दुचाकीवर जावून आदळली. यावेळी अपघात होऊन जखमी तिघांना येथील ग्रामीण रुग्णालयात दाखल करण्यात आले. या अपघातात रिक्षाचालक महेंद्र कोळी याचे डोक्याला जबर मार लागला आहे. तर निवृत्ती पुंडलिक पाटील यांच्या डाव्या खांद्याला फ्रॅक्चर होऊन त्यांच्या डोक्याला देखील गंभीर दुखापत झाली आहे.

त्यांच्या पत्नी शारदा पाटीलयांना किरकोळ दुखापत झाली. जखमींवर डॉक्टर शुभम तिडके, अधिपरिचारिका नेपाली भोळे, आशा आदीवाल, भूषण गाजरे यांनी प्रथमोपचार करून निवृत्ती पाटील यांना तातडीने फैजपूर येथील खासगी रुग्णालयात तर महेंद्र कोळी यास जळगाव जिल्हा शासकीय वैद्यकीय महाविद्यालयांमध्ये पुढील उपचारासाठी हलवण्यात आले आहे.