जळगाव ः येथील शिवाजी नगर वासीयांसाठी महत्वाचा असलेला शिवाजीनगर उड्डाण पुलाचे (Shivajinagar Bridge) काम अद्यापही अपूर्णच आहे. या कामांची पाहणी आज जिल्हाधिकारी अभिजीत राउत (Collector Abhijeet Raut) यांनी सकाळी अकराला केली. माहिती अधिकार कार्यकर्ते दिपककुमार गुप्ता यांनी शिवाजी नगरच्या कामाबाबत वारंवार पाठपूरावा करून कामाची स्थिती काय आहे ? नागरिकांचे हाल कसे होताहेत याबाबत माहिती जाणून घेण्यासाठी जिल्हाधिकारी राउत यांच्याकडे आग्रह धरला होता.

आज सकाळी जिल्हाधिकारी राऊत यांनी शिवाजी नगर पुलाच्या कामाची पाहणी केली. यावेळी श्री.गुप्ता, सार्वजनिक बांधकाम विभागाचे अभियंता सूभाष राउत, कंत्राटदार उपस्थित होते. काम किती टक्के बाकी आहे, कोणकोणते बाकी, पोल शिफ्टींग किती बाकी आदी कामांची माहिती जिल्हाधिकाऱ्यांनी घेतली.

जिल्हाधिकारी राऊत यांनी सांगितले, की शिवाजीनगरसह ममुराबाद, चोपडा, यावल कडे जाणाऱ्या नागरिकांसाठी शिवाजीनगर पुल महत्वाचा आहे. २५ टक्के नागरिकांची वाहतूक या पुलावरून होते. लवकरात लवकर पुलाचे काम व्हावे अशी अपेक्षा आहे. मात्र मध्यंतरी आलेला कोरोना, यंदा झालेली अतीवृष्टी यामुळे पुलाचे काम रखडले. निधी अभावी पुलाच्या कामात येणारे विजेच्या खांबाची अडचण होती. महापालिकेने आता निधी दिल्याने पोल शिफ्टींगचे काम सुरू केले आहे. लवकरच ते पुल जाईल. दोन महिन्यात स्लॅब लेव्हल पर्यंत काम करण्याचे व फेब्रूवारी २०२२ पर्यंत काम पूर्ण करण्याच्या सूचना कंत्राटदाराला दिल्या आहेत. याकामावर जिल्हा प्रशासन लक्ष ठेवून असून काम पूर्ण होण्यासाठी पाठपूरावा करणार आहे.