एरंडोल (जि. जळगाव) : मोटरसायकल घेण्यासाठी माहेरून एक लाख रुपये घेऊन ये, अशी मागणी करून विवाहितेच्या चारित्र्यावर संशय घेत छळ केल्याच्या आरोपावरून पती, सासू, नणंद, दीर यांच्याविरोधात गुन्हा दाखल करण्यात आला.

शहरातील मुल्लावाडा येथील रहिवासी शाहिस्ता इमरानखान पठाण (वय २६, ह. मु. शाहूनगर, नुरानी मशीदजवळ, जळगाव) यांचा विवाह २ मार्च २०१४ रोजी इमरानखान लुकमानखान यांच्याशी झाला होता. शाहिस्ता पठाण यांना तीन अपत्य आहेत. विवाहानंतर एक वर्ष शाहिस्ता यांना पती व सासरच्या लोकांनी चांगली वागणूक दिली. मात्र एक वर्षानंतर सासरच्या लोकांनी लग्नात आमचा मानपान झाला नाही, घरगुती सामान कमी दिल आदी विविध कारणांमुळे छळ करण्यास सुरवात केली. माहेरहून एक लाख रुपये घेऊन ये, अशी मागणी केली.

शाहिस्ता यांची माहेरची परिस्थिती गरिबीची असल्यामुळे तसेच तीन लहान मुले असल्यामुळे तिने सासरच्या लोकांचा त्रास सहन केला. माहेरून एक लाख रुपये आणले नाही तर तुला ठार मारू, तलाक देऊ अशी धमकी सासरच्या लोकांनी दिली. विवाहितेची आई जैब्बूंनीसाबी जळगाव येथे गेल्या असता सासरच्या लोकांनी शाहिस्तेसह तीच्या आईस देखील शिवीगाळ करून मारहाण केली. पती इमरानखान पठाण यांनी तीन वेळा तोंडी तलाक दिला.

याबाबत शाहिस्ता इमरानखान यांनी दिलेल्या तक्रारीवरून पती इमरानखान, सासू बानोबी लुकमानखान, नणंद शबाना आरिफ खान, शमीम रईस खान, दीर शाहरुख लुकमान खान (सर्व रा. शाहूनगर, जळगाव) आणि रुबिना इमरानखान (रा. शिवणा, ता. सिल्लोड) यांच्याविरुद्ध गुन्हा दाखल केला असून पोलिस निरीक्षक ज्ञानेश्वर जाधव यांच्या मार्गदर्शनाखाली हवालदार अनिल पाटील, सुनील लोहार तपास करीत आहेत.